വിഴിഞ്ഞം: തിരുവനന്തപുരം കഴക്കൂട്ടം-കാരോട് ദേശീയപാതയില്‍ മുക്കോലയില്‍ നിയന്ത്രണംവിട്ട കാര്‍ ഇടിച്ച് ബൈക്ക് യാത്രികന് ദാരുണാന്ത്യം. കാഞ്ഞിരംകുളം മുളനിന്ന പൊട്ടക്കുളം വീട്ടില്‍ എം.ജെ. രതീഷ് കുമാര്‍ (40) ആണ് അപകടത്തില്‍ മരിച്ചത്. അപകടത്തിൽ മറ്റൊരു സ്‌കൂട്ടര്‍ യാത്രക്കാരന്‍ ഗുരുതര പരിക്കേറ്റു. ചൊവ്വര സ്വദേശി മണിപ്രദീപിനാണ് ഗുരുതരമായി പരിക്കേറ്റത്.
വ്യാഴാഴ്ച വൈകീട്ട് 3.15-ഓടെ ദേശീയപാതയിലെ മുക്കോല റൂട്ടിലാണ് അപകടം നടന്നത്.കോവളം ഭാഗത്തു നിന്ന് കാഞ്ഞിരംകുളം ഭാഗത്തേക്കായിരുന്നു അപകടത്തില്‍ മരിച്ച രതീഷ് തന്റെ ബൈക്കില്‍ യാത്ര ചെയ്തിരുന്നത്. ഇതേദിശയില്‍ തന്നെയായിരുന്നു മണിപ്രദീപും സ്‌കൂട്ടറില്‍ പോയത്. ഇരുവരും സഞ്ചരിച്ച അതേപാതയിലൂടെ തമിഴ്‌നാട്ടിലേക്ക് പോകുകയായിരുന്ന കാർ ഇവരുടെ വാഹനങ്ങളിലേക്ക് ഇടിച്ചുകയറിയത്.
ഇടിയുടെ ആഘാതത്തില്‍ ബൈക്കില്‍ നിന്ന് തെറിച്ചുവീണ രതീഷിന് തലയ്ക്കും ശരീരത്തിനും ഗുരുതരമായി പരിക്കേറ്റു. മണിപ്രദീപിന്റെ സ്‌കൂട്ടറും കാറും ഒന്നാകെ വഴിയരികിലെ ഓടയില്‍ പതിച്ചു.