തിരുവനന്തപുരം: നിയമസഭാ തിരഞ്ഞെടുപ്പിൽ 110 സീറ്റുകൾ നേടി ഇടതുമുന്നണി അധികാരം നിലനിർത്തുമെന്ന് മന്ത്രി പി.എ. മുഹമ്മദ് റിയാസ്. ഭരണവിരുദ്ധ വികാരമില്ലെന്നും വികസന നേട്ടങ്ങൾ ജനങ്ങളിലെത്തിക്കാൻ മുഖ്യമന്ത്രിയുടെ നേതൃത്വത്തിൽ 'മിഷൻ 110' എന്ന വിപുലമായ കർമ്മപദ്ധതിക്ക് രൂപം നൽകിയതായും അദ്ദേഹം പറഞ്ഞു. തിരുവനന്തപുരത്ത് നടന്ന പ്രത്യേക മന്ത്രിസഭാ യോഗത്തിന് പിന്നാലെയാണ് സർക്കാർ തിരഞ്ഞെടുപ്പ് തന്ത്രങ്ങൾ വെളിപ്പെടുത്തിയത്.(Ours is the people's strategy, Minister PA Mohammed Riyas on Assembly elections)
തിരഞ്ഞെടുപ്പിന് മുന്നോടിയായി സർക്കാർ ആസൂത്രണം ചെയ്ത നിർണ്ണായക ആക്ഷൻ പ്ലാനാണ് മിഷൻ 110. അടുത്ത 50 ദിവസത്തിനുള്ളിൽ സർക്കാരിന്റെ വികസന നേട്ടങ്ങൾ ഓരോ വോട്ടർമാരിലേക്കും എത്തിക്കുകയാണ് പ്രധാന ലക്ഷ്യം.
110 മണ്ഡലങ്ങളുടെ ഏകോപന ചുമതല മുഖ്യമന്ത്രി നേരിട്ട് മന്ത്രിമാർക്ക് വീതിച്ചു നൽകി. ഭരണനേട്ടങ്ങൾ ജനങ്ങളിലെത്തിക്കുന്നതിലെ പോരായ്മകൾ പരിഹരിക്കാൻ മുഖ്യമന്ത്രിയുടെ ഓഫീസ് നേരിട്ടാണ് ഈ പദ്ധതി നിരീക്ഷിക്കുന്നത്. താഴെത്തട്ടിലുള്ള കുടുംബയോഗങ്ങൾക്ക് പുറമെ സോഷ്യൽ മീഡിയ വഴിയുള്ള വിപുലമായ പ്രചാരണ പരിപാടികളും പദ്ധതിയുടെ ഭാഗമാണ്.
കോൺഗ്രസിന്റെ തിരഞ്ഞെടുപ്പ് തന്ത്രജ്ഞനായ സുനിൽ കനഗോലുവിനെ പരിഹസിച്ചുകൊണ്ടായിരുന്നു മന്ത്രി റിയാസിന്റെ പ്രതികരണം. "എൽഡിഎഫിന് കനഗോലുവിന്റേയോ മറ്റ് ഗോലുമാരുടെയോ തന്ത്രങ്ങളില്ല. ജനങ്ങളുടെ സ്ട്രാറ്റജിയാണ് ഞങ്ങളുടേത്. കോഴിക്കോട് ജില്ലയിലെ 13 മണ്ഡലങ്ങളിലും എൽഡിഎഫിന് വെല്ലുവിളികളില്ല. ബേപ്പൂരിൽ ആരെ വേണമെങ്കിലും യുഡിഎഫ് സ്ഥാനാർത്ഥിയാക്കട്ടെ," മന്ത്രി പറഞ്ഞു.
താൻ പങ്കെടുത്ത 156 കുടുംബയോഗങ്ങളിൽ എവിടെയും സർക്കാരിനെതിരായ വിമർശനങ്ങൾ ഉയർന്നുവന്നില്ലെന്നും അദ്ദേഹം അവകാശപ്പെട്ടു. ഭരണവിരുദ്ധ വികാരം മറികടക്കാനും സർക്കാരിന്റെ പ്രതിച്ഛായ വർദ്ധിപ്പിക്കാനുമുള്ള ശക്തമായ നീക്കമായാണ് രാഷ്ട്രീയ നിരീക്ഷകർ ഈ ആക്ഷൻ പ്ലാനിനെ കാണുന്നത്.