പാലക്കാട്: ചികിത്സാ പിഴവ് മൂലം കൈ മുറിച്ചുമാറ്റേണ്ടി വന്ന വിനോദിനി എന്ന ഒൻപത് വയസ്സുകാരിയുടെ വീട് നിർമ്മാണത്തിനായുള്ള ആദ്യ ഘട്ടം പൂർത്തിയായി. വിനോദിനിക്കും കുടുംബത്തിനും വീട് നിർമ്മിക്കാനായി പാലക്കാട് പല്ലശ്ശന പഞ്ചായത്തിലെ പല്ലാവൂരിൽ അഞ്ച് സെന്റ് ഭൂമി വാങ്ങി രജിസ്റ്റർ ചെയ്തു.(Opposition leader VD Satheesan comes to Vinodhini’s help)
കേരള ലോക്കൽ സെൽഫ് ഗവൺമെന്റ് എംപ്ലോയീസ് ഓർഗനൈസേഷനാണ് കുടുംബത്തിന് ഭൂമി വാങ്ങി നൽകിയത്. വീട് നിർമ്മിക്കാൻ സ്ഥലമില്ലെന്ന വിനോദിനിയുടെ കുടുംബത്തിന്റെ വിഷമം ശ്രദ്ധയിൽപ്പെട്ട പ്രതിപക്ഷ നേതാവ് വി.ഡി. സതീശൻ, വസ്തു വാങ്ങി നൽകാൻ ഈ സംഘടനയെ ചുമതലപ്പെടുത്തുകയായിരുന്നു.
ഈ മാസം 17-ന് പാലക്കാട് മുൻസിപ്പൽ സ്റ്റേഡിയത്തിൽ വെച്ച് നടക്കുന്ന ചടങ്ങിൽ വെച്ച് പ്രതിപക്ഷ നേതാവ് വി.ഡി. സതീശൻ ഭൂമിയുടെ രേഖകൾ കുടുംബത്തിന് കൈമാറും. ഭൂമി ലഭ്യമായ സാഹചര്യത്തിൽ, കോഴിക്കോട് ആസ്ഥാനമായി പ്രവർത്തിക്കുന്ന ‘ഷെൽട്ടർ ഇന്ത്യ’ എന്ന ചാരിറ്റബിൾ സൊസൈറ്റിയുടെ നേതൃത്വത്തിൽ വീട് നിർമ്മാണത്തിനുള്ള നടപടികൾ ഉടൻ ആരംഭിക്കും.
