തിരുവനന്തപുരം: സംസ്ഥാനത്തെ കെഎസ്ഇബി (KSEB) സെക്ഷൻ ഓഫീസുകളിൽ വിജിലൻസ് നടത്തിയ വ്യാപക മിന്നൽ പരിശോധനയിൽ വൻ ക്രമക്കേടുകൾ കണ്ടെത്തി. ‘ഓപ്പറേഷൻ ഷോർട്ട് സർക്യൂട്ട്’ എന്ന പേരിൽ 70 സെക്ഷൻ ഓഫീസുകളിലായി നടന്ന പരിശോധനയിൽ ഉദ്യോഗസ്ഥരിൽ നിന്ന് മാത്രം 16,50,000 രൂപയാണ് പിടിച്ചെടുത്തത്. കരാർ നൽകുന്നതിലും ബില്ലുകൾ പാസാക്കുന്നതിലും വലിയ തോതിലുള്ള അഴിമതി നടന്നതായി വിജിലൻസ് സ്ഥിരീകരിച്ചു.
കരാർ ജോലികളുടെ ടെൻഡർ അനുവദിക്കുന്നതിൽ ഉദ്യോഗസ്ഥരും കരാറുകാരും തമ്മിലുള്ള അവിശുദ്ധ കൂട്ടുകെട്ട് വിജിലൻസ് കണ്ടെത്തി. കരാറുകാരിൽ നിന്ന് കമ്മീഷൻ കൈപ്പറ്റുന്ന ഉദ്യോഗസ്ഥർ, ജോലികൾ കൃത്യമായി പരിശോധിക്കാതെ തന്നെ ബില്ലുകൾ മാറി പണം നൽകുന്നതായും വ്യക്തമായിട്ടുണ്ട്.
ഉപഭോക്താക്കളുടെ വൈദ്യുതി റീഡിങ്ങിൽ കൃത്രിമം കാട്ടി അനധികൃത ഇളവുകൾ നൽകുന്നതായി പരാതി ഉയർന്നിരുന്നു. ഇത് കണ്ടെത്തുന്നത് ഒഴിവാക്കാൻ എനർജി മീറ്ററുകൾ മനഃപൂർവ്വം തകരാറിലാക്കുകയോ, തകരാറാണെന്ന് വ്യാജമായി കാണിച്ച് മാറ്റി സ്ഥാപിക്കുകയോ ചെയ്യുന്നതായും പരിശോധനയിൽ തെളിഞ്ഞു.
കരാറുകൾ നൽകുന്നതിൽ വ്യാപകമായ സ്വജനപക്ഷപാതം നടന്നതായും വിജിലൻസ് സംഘം കണ്ടെത്തിയ ഫയലുകൾ സൂചിപ്പിക്കുന്നു.
ഡയറക്ടറുടെ നിർദ്ദേശം:വിജിലൻസ് ഡയറക്ടർ മനോജ് എബ്രഹാമിന്റെ നിർദ്ദേശപ്രകാരമാണ് സംസ്ഥാനവ്യാപകമായി ഈ അടിയന്തര പരിശോധന നടത്തിയത്. വരും ദിവസങ്ങളിലും കൂടുതൽ ഓഫീസുകളിൽ പരിശോധന തുടരുമെന്നും അഴിമതിക്കാരായ ഉദ്യോഗസ്ഥർക്കെതിരെ കർശന നടപടി സ്വീകരിക്കുമെന്നും വിജിലൻസ് വൃത്തങ്ങൾ അറിയിച്ചു.