കൊച്ചി : ഓപ്പറേഷൻ നുംഖോർ വഴി, ഭൂട്ടാനിൽ നിന്ന് കള്ളക്കടത്തിലൂടെ എത്തിയ കാറുകൾ പിടിച്ചെടുത്ത സംഭവത്തിൽ ആഡംബര കാറുകൾ ഉടമകൾ തന്നെ സൂക്ഷിക്കണമെന്ന് കസ്റ്റംസ്. ഇവ സേഫ് കസ്റ്റഡിയിൽ സൂക്ഷിക്കാനായി നോട്ടീസ് നൽകും.(Operation Numkhor customs raid)
നിയമ നടപടികൾ അവസാനിക്കുന്നത് വരെ ഇവ ഉപയോഗിക്കാനാകില്ല. ഉടമകളെ നോട്ടീസ് നൽകി വിളിച്ചുവരുത്തും. നിയമവിരുദ്ധമായല്ല കാർ എത്തിച്ചത് എന്ന് തെളിയിക്കേണ്ടത് ഇവരുടെ ഉത്തരവാദിത്വമാണ്. കുറ്റം തെളിയുന്ന പക്ഷം വാഹനങ്ങൾ കണ്ടുകെട്ടും.
ഓപ്പറേഷൻ നുംഖോർ സംബന്ധിച്ച ഭൂട്ടാനിൽ നിന്ന് ആഡംബര കാറുകൾ നികുതി വെട്ടിച്ച് ഇന്ത്യയിലേക്ക് കടത്തുന്ന സംഭവത്തിൽ മറ്റു കേന്ദ്ര ഏജൻസികളും അന്വേഷണം നടത്തും. വ്യാപക കള്ളപ്പണ ഇടപാടാണ് തട്ടിപ്പിൽ നടന്നിരിക്കുന്നത് എന്ന് കണ്ടെത്തിയിട്ടുണ്ട്. ഇ ഡി ഇക്കാര്യം അന്വേഷിക്കും. കേന്ദ്ര ജി എസ് ടി വിഭാഗം ആണ് ജി എസ് ടി തട്ടിപ്പ് അന്വേഷിക്കുന്നത്. എംബസിയുടെ പേരിലുള്ള വ്യാജ രേഖ ചമയ്ക്കൽ കേന്ദ്ര വിദേശകാര്യ മന്ത്രാലയത്തെ അറിയിക്കും.
വ്യാജ രേഖകൾ ഉണ്ടാക്കിയ കാര്യം സംസ്ഥാന പൊലീസിന് അന്വേഷിക്കാവുന്നതാണ്. അതാത് സംസ്ഥാനങ്ങളോട് വാഹനങ്ങളുടെ രജിസ്‌ട്രേഷൻ ഉൾപ്പെടെ റദ്ദാക്കാൻ ആവശ്യപ്പെടും. അതേസമയം, സംഭവത്തിൽ നടൻ ദുൽഖർ സൽമാൻ അടക്കമുള്ളവരോട് നേരിട്ട് ഹാജരാകാൻ നോട്ടീസ് നൽകും.