തിരുവനന്തപുരം: ലഹരി വിപണന ശൃംഖലകൾ തകർക്കുന്നതിനായി കേരള പോലീസ് നടത്തുന്ന 'ഓപ്പറേഷൻ ഡി ഹണ്ടിന്റെ' ഭാഗമായി സംസ്ഥാന വ്യാപകമായി വൻ പരിശോധന. മയക്കുമരുന്ന് വിൽപനയുമായി ബന്ധമുണ്ടെന്ന് സംശയിക്കുന്ന 1430 പേരെ പരിശോധനയ്ക്ക് വിധേയമാക്കി. നിരോധിത മയക്കുമരുന്നുകൾ കൈവശം വെച്ചതിന് 52 കേസുകൾ രജിസ്റ്റർ ചെയ്യുകയും 58 പേരെ അറസ്റ്റ് ചെയ്യുകയും ചെയ്തു.
പിടിച്ചെടുത്ത ലഹരിമരുന്നുകൾ:
എംഡിഎംഎ (MDMA): 823.77 ഗ്രാം
കഞ്ചാവ്: 2.038 കിലോ ഗ്രാം
കഞ്ചാവ് ബീഡി: 41 എണ്ണം
മയക്കുമരുന്ന് ശേഖരിക്കുന്നവരെയും വിതരണം ചെയ്യുന്നവരെയും കണ്ടെത്താൻ ക്രമസമാധാന വിഭാഗം എഡിജിപിയുടെ നേരിട്ടുള്ള മേൽനോട്ടത്തിലാണ് പരിശോധന നടക്കുന്നത്. സംസ്ഥാന തലത്തിൽ ആന്റി നർക്കോട്ടിക്സ് ഇന്റലിജൻസ് സെല്ലും എൻഡിപിഎസ് (NDPS) കോർഡിനേഷൻ സെല്ലും സജീവമായി രംഗത്തുണ്ട്.
മയക്കുമരുന്ന് വിപണനത്തെക്കുറിച്ച് പൊതുജനങ്ങൾക്ക് വിവരങ്ങൾ നൽകാനായി 24 മണിക്കൂറും പ്രവർത്തിക്കുന്ന ആന്റി നർക്കോട്ടിക് കൺട്രോൾ റൂം സജ്ജമാണ്. 9497927797 എന്ന നമ്പറിലേക്ക് വിവരങ്ങൾ അറിയിക്കാം. വിവരം നൽകുന്നവരുടെ പേരോ മറ്റ് വിവരങ്ങളോ രഹസ്യമായി സൂക്ഷിക്കുമെന്ന് പോലീസ് ഉറപ്പുനൽകുന്നു.