കോഴിക്കോട്: കാലിക്കറ്റ് സർവകലാശാലാ വിദ്യാർത്ഥി യൂണിയൻ (DSU) ഭാരവാഹികളുടെ സത്യപ്രതിജ്ഞാ ചടങ്ങിൽ വിസിയും വിദ്യാർത്ഥി പ്രതിനിധികളും തമ്മിൽ പോര്. ഔദ്യോഗിക വാചകങ്ങൾ തിരുത്തി 'രക്തസാക്ഷികളുടെ പേരിൽ' സത്യപ്രതിജ്ഞ ചെയ്തതിനെത്തുടർന്ന് വൈസ് ചാൻസലർ ഡോ. പി. രവീന്ദ്രൻ ചടങ്ങ് റദ്ദാക്കി.(Oath-taking ceremony in the name of martyrs, Calicut VC walks out of ceremony )
യൂണിയൻ ചെയർമാനായി തിരഞ്ഞെടുക്കപ്പെട്ട അമൽ ദേവ് സത്യപ്രതിജ്ഞ ചൊല്ലുമ്പോഴാണ് വിവാദമുണ്ടായത്. "നവലോക ക്രമത്തിനായുള്ള പോരാട്ടത്തിൽ ജീവൻ നഷ്ടപ്പെട്ട അനശ്വര രക്തസാക്ഷികളുടെ പേരിൽ" എന്ന് സത്യപ്രതിജ്ഞാ വാചകത്തിൽ കൂട്ടിച്ചേർത്തതാണ് വിസിയെ പ്രകോപിപ്പിച്ചത്.
ഔദ്യോഗിക സത്യപ്രതിജ്ഞാ വാചകങ്ങളിൽ മാറ്റം വരുത്തുന്നത് സർവകലാശാലാ ചട്ടങ്ങൾക്ക് വിരുദ്ധമാണെന്ന് വിസി വ്യക്തമാക്കി. ഔദ്യോഗിക വാചകങ്ങളിൽ നിന്ന് വ്യതിചലിച്ചാൽ അത് അംഗീകരിക്കില്ലെന്ന് സത്യപ്രതിജ്ഞയ്ക്ക് മുൻപ് തന്നെ വിസി ഭാരവാഹികളെ അറിയിച്ചിരുന്നു. മുന്നറിയിപ്പ് അവഗണിച്ച് സത്യപ്രതിജ്ഞ തുടർന്നതോടെ വിസി വേദിയിൽ നിന്ന് ഇറങ്ങിപ്പോവുകയും ചടങ്ങ് അസാധുവാക്കിയതായി പ്രഖ്യാപിക്കുകയും ചെയ്തു.