കോട്ടയം: യു.ഡി.എഫ്. പ്രവേശനവുമായി ബന്ധപ്പെട്ട് നടക്കുന്ന ചർച്ചകളും അഭ്യൂഹങ്ങളും കേരള കോൺഗ്രസ് എം നേതൃത്വം തള്ളി. നിലവിലെ സാഹചര്യത്തിൽ എൽ.ഡി.എഫ്. വിടേണ്ട ഒരു ആവശ്യവുമില്ലെന്ന് പാർട്ടി ചെയർമാൻ ജോസ് കെ. മാണി മുതിർന്ന നേതാക്കളെ അറിയിച്ചതായാണ് വിവരം.(No need to leave LDF, Kerala Congress M rejects UDF entry talks)
യു.ഡി.എഫ്. അപമാനിച്ച് ഇറക്കിവിട്ട ചരിത്രമാണ് കേരള കോൺഗ്രസ് എമ്മിനുള്ളത്. ഇത് നേതാക്കളെ ഓർമ്മിപ്പിച്ചായിരുന്നു അദ്ദേഹത്തിന്റെ പ്രതികരണം. നിലവിൽ പ്രചരിക്കുന്ന ചർച്ചകളിൽ കഴമ്പില്ലെന്ന് അണികളെയും പാർട്ടി ബോധ്യപ്പെടുത്തും.
തെരഞ്ഞെടുപ്പ് പരാജയത്തിന്റെ പേരിൽ മുന്നണി വിടില്ലെന്ന് കേരള കോൺഗ്രസ് എം ജനറൽ സെക്രട്ടറി വ്യക്തമാക്കി. "പരാജയം ഉണ്ടായാലും മുന്നണി വിടില്ല," അദ്ദേഹം കൂട്ടിച്ചേർത്തു. എൽ.ഡി.എഫിൽ കേരള കോൺഗ്രസ് എം ശക്തമായി തുടരുമെന്ന സൂചനയാണ് നേതൃത്വം നൽകുന്നത്.