ചെന്നൈ: ആർട്ടിഫിഷ്യൽ ഇന്റലിജൻസ് (AI) ഉപയോഗിച്ച് തന്റെ ചിത്രങ്ങൾ മോശമായ രീതിയിൽ എഡിറ്റ് ചെയ്ത് പ്രചരിപ്പിക്കുന്നവർക്കെതിരെ നിയമനടപടിയുമായി നടി നിവേദ തോമസ്. ഇത് തന്റെ സ്വകാര്യതയിലേക്കുള്ള ഗുരുതരമായ കടന്നുകയറ്റമാണെന്നും ഇത്തരക്കാർക്ക് ശക്തമായ താക്കീത് നൽകുന്നതായും താരം സോഷ്യൽ മീഡിയയിലൂടെ അറിയിച്ചു.
ഇൻസ്റ്റഗ്രാമിൽ താൻ പങ്കുവെച്ച ചിത്രങ്ങൾ ദുരുപയോഗം ചെയ്ത് എഐ സഹായത്തോടെ അശ്ലീല ചുവയുള്ള രീതിയിൽ മാറ്റം വരുത്തി പ്രചരിപ്പിക്കുന്നത് ശ്രദ്ധയിൽപ്പെട്ടതിനെത്തുടർന്നാണ് നടിയുടെ പ്രതികരണം.
"എന്റെ സമ്മതമില്ലാതെ ഇത്തരത്തിൽ ഉള്ളടക്കം നിർമിക്കുന്നതും പ്രചരിപ്പിക്കുന്നതും അംഗീകരിക്കാനാവില്ല. ഇത് ഡിജിറ്റൽ സ്വത്വവഞ്ചനയാണ് (Digital Identity Theft). ഇത്തരം ചിത്രങ്ങൾ ഉടനടി നീക്കം ചെയ്യണം." - നിവേദ വ്യക്തമാക്കി.
തമിഴ് ഓൺലൈൻ ചാനലുകളിലടക്കം ഈ ചിത്രങ്ങൾ വ്യാപകമായി പ്രചരിച്ചിരുന്നു. അജ്ഞാത അക്കൗണ്ടുകൾ വഴി ഇത്തരം ചിത്രങ്ങൾ പങ്കുവെക്കുന്നവർക്കെതിരെ നിയമനടപടി സ്വീകരിക്കുമെന്നും നിവേദ മുന്നറിയിപ്പ് നൽകി. ഇത്തരം വ്യാജ ചിത്രങ്ങൾ ആരും വീണ്ടും പങ്കുവെക്കരുതെന്നും താരം അഭ്യർത്ഥിച്ചു.
ആധുനിക സാങ്കേതികവിദ്യയായ എഐ ഉപയോഗിച്ച് സിനിമാ താരങ്ങളുടെ 'ഡീപ് ഫേക്ക്' ചിത്രങ്ങൾ നിർമിക്കുന്നത് സമീപകാലത്ത് വലിയ വിവാദങ്ങൾക്ക് വഴിതെളിച്ചിട്ടുണ്ട്. രശ്മിക മന്ദാനയുൾപ്പെടെയുള്ള പ്രമുഖ താരങ്ങൾ ഇതിനെതിരെ നേരത്തെ രംഗത്തെത്തിയിരുന്നു.