പാലക്കാട്: അട്ടപ്പാടിയിലെ ഷോളയൂർ സ്വർണ്ണപ്പിരിവിൽ നവജാതശിശു മരിച്ചു. ആറ് മാസം ഗർഭിണിയായിരുന്ന സുമിത്രയുടെ കുഞ്ഞാണ് മരിച്ചത്. ഈ കുടുംബത്തിൽ ആറുതവണയായി കുഞ്ഞുങ്ങൾ മരിക്കുന്നത് പതിവായതിനെ തുടർന്ന് ജില്ലാ കളക്ടർ വിശദമായ റിപ്പോർട്ട് തേടി.(Newborn baby dies in Attappadi, Collector seeks report)
ഇന്ന് രാവിലെ വീട്ടിൽ വെച്ചാണ് സുമിത്ര പ്രസവിച്ചത്. ഉടൻ തന്നെ കുഞ്ഞിനെ അട്ടപ്പാടിയിലെ ഒരു സ്വകാര്യ ആശുപത്രിയിലേക്ക് എത്തിച്ചെങ്കിലും മരണം സംഭവിക്കുകയായിരുന്നു. സ്ഥിരമായി കുഞ്ഞുങ്ങൾ മരിക്കുന്ന ഈ സാഹചര്യത്തിൽ ജില്ലാ കളക്ടർ ഇടപെടൽ നടത്തിയിട്ടുണ്ട്. ജില്ലാ മെഡിക്കൽ ഓഫീസർ, ഐ.സി.ഡി.എസ്. അധികൃതർ എന്നിവരോടാണ് കളക്ടർ റിപ്പോർട്ട് തേടിയിരിക്കുന്നത്.
ആശുപത്രിക്ക് വീഴ്ചയുണ്ടോയെന്ന് പരിശോധിക്കാനും നിർദേശം നൽകിയിട്ടുണ്ട്. സുമിത്രയുടെ ആറാമത്തെ പ്രസവമായിരുന്നു ഇത്. നിർഭാഗ്യവശാൽ, ഇതിനുമുമ്പുള്ള പ്രസവങ്ങളിലും കുഞ്ഞുങ്ങൾ മരിച്ചിരുന്നു. ഇത്തവണ മാർച്ചിലായിരുന്നു പ്രസവം നടക്കേണ്ടിയിരുന്നത്, എന്നാൽ ആറ് മാസം പൂർത്തിയായപ്പോഴേക്കും പ്രസവം നടന്നു.
യുവതിയെ നിലവിൽ കോട്ടത്തറ താലൂക്ക് ആശുപത്രിയിൽ പ്രവേശിപ്പിച്ചിട്ടുണ്ട്. സുമിത്രയുടെ ആരോഗ്യനില തൃപ്തികരമാണെന്ന് ആശുപത്രി അധികൃതർ അറിയിച്ചു. കളക്ടറുടെ ഇടപെടലിനെ തുടർന്ന് സുമിത്രയെ വിശദമായ പരിശോധനകൾക്കായി മെഡിക്കൽ കോളേജ് ആശുപത്രിയിലേക്ക് മാറ്റും.