മലപ്പുറം: തദ്ദേശ തിരഞ്ഞെടുപ്പിൽ യു.ഡി.എഫ്. നേടിയ വിജയം ആഘോഷിക്കുന്നതിനിടെ പടക്കം പൊട്ടിത്തെറിച്ച് മരിച്ച മുസ്ലിം ലീഗ് പ്രവർത്തകനായ ഇർഷാദിന് നാടിന്റെ കണ്ണീരോടെ വിട. ചെറുകാവ് പഞ്ചായത്തിലെ പെരിയമ്പലം വാർഡ് എൽ.ഡി.എഫിൽ നിന്ന് യു.ഡി.എഫ്. പിടിച്ചെടുത്ത സന്തോഷം ആഘോഷിക്കുന്നതിനിടെയാണ് പെരിയമ്പലം പുത്തിലായി പുറായിൽ ഇർഷാദ് (41) ദാരുണമായി മരിച്ചത്.(Muslim League activist died in a firecracker explosion during the victory celebration)
താൻ ഏറെ സ്നേഹിച്ച പാർട്ടിയുടെ വിജയം ആഘോഷിക്കുന്നതിനായി ശനിയാഴ്ചയാണ് ഇർഷാദ് സ്കൂട്ടറുമായി പുളിക്കൽ പറവൂർ റോഡിലേക്ക് തിരിച്ചത്. ചെറുകാവിലെ വിജയാഘോഷത്തിനിടെ, ഇർഷാദിന്റെ സ്കൂട്ടറിൽ സൂക്ഷിച്ചിരുന്ന പടക്കം അപ്രതീക്ഷിതമായി പൊട്ടിത്തെറിക്കുകയായിരുന്നു. അപകടത്തിൽ ഗുരുതരമായി പരിക്കേറ്റ ഇർഷാദ് മരണപ്പെടുകയായിരുന്നു. ഇർഷാദിന്റെ മരണവാർത്ത സ്ഥിരീകരിച്ചതോടെ പ്രദേശത്തെ യു.ഡി.എഫ്. ആഘോഷങ്ങളെല്ലാം നിർത്തിവെച്ചു.
കോഴിക്കോട് മെഡിക്കൽ കോളേജിൽ പോസ്റ്റ്മോർട്ടത്തിന് ശേഷം ഞായറാഴ്ച ഉച്ചയോടെയാണ് ഇർഷാദിന്റെ മൃതദേഹം നാട്ടിലെത്തിച്ചത്. വീടിനടുത്തുള്ള പുളിക്കൽ മദീനത്തുൽ ഉലൂം അറബിക് കോളേജിലും തുടർന്ന് വീട്ടിലും പൊതുദർശനത്തിന് വെച്ചപ്പോൾ ആയിരങ്ങളാണ് അന്ത്യാഞ്ജലി അർപ്പിക്കാൻ ഒഴുകിയെത്തിയത്.
പുളിക്കൽ മദീനത്തുൽ ഉലൂമിലും തുടർന്ന് പുളിക്കൽ ജുമാ മസ്ജിദിലും നടന്ന മയ്യിത്ത് നമസ്കാരത്തിനും വൻ ജനാവലി തടിച്ചുകൂടി. മയ്യിത്ത് നമസ്കാരത്തിന് ശേഷം പുളിക്കൽ ജുമാ മസ്ജിദ് ഖബർസ്ഥാനിൽ മൃതദേഹം ഖബറടക്കി. സജീവ ലീഗ് പ്രവർത്തകനായിരുന്ന ഇർഷാദിന്റെ അപ്രതീക്ഷിത വിയോഗം നാടിനെ ഒന്നാകെ ദുഃഖത്തിലാഴ്ത്തിയിരിക്കുകയാണ്.