കോട്ടയം: ശബരിമല സ്വർണ്ണക്കൊള്ള കേസിൽ നിലവിൽ റിമാൻഡിൽ കഴിയുന്ന മുരാരി ബാബുവിനെതിരെ വിജിലൻസ് അന്വേഷണം ശക്തമാകുന്നു (Murari Babu Vigilance Probe). അനധികൃത സ്വത്ത് സമ്പാദനവുമായി ബന്ധപ്പെട്ട അന്വേഷണത്തിന്റെ ഭാഗമായി വിജിലൻസ് സ്പെഷ്യൽ സംഘം ഇന്ന് ചങ്ങനാശ്ശേരിയിൽ പരിശോധന നടത്തി. ചങ്ങനാശ്ശേരി നഗരസഭയിലെത്തിയ സംഘം മുരാരി ബാബുവിന്റെ വീടിന്റെ ഉടമസ്ഥാവകാശം സംബന്ധിച്ച രേഖകൾ ശേഖരിച്ചു. വീടിന്റെ അളവും നികുതി വിവരങ്ങളും ഉൾപ്പെടെയുള്ള കാര്യങ്ങളാണ് നഗരസഭയിൽ നിന്ന് പരിശോധിച്ചത്.
നഗരസഭയ്ക്ക് പുറമെ ചങ്ങനാശ്ശേരി സബ് രജിസ്ട്രാർ ഓഫീസിലും വിജിലൻസ് സംഘം പരിശോധന നടത്തി. മുരാരി ബാബുവിന്റെയും കുടുംബാംഗങ്ങളുടെയും പേരിലുള്ള ഭൂമി ഇടപാടുകൾ സംബന്ധിച്ച വിവരങ്ങളാണ് ഇവിടെ നിന്ന് ശേഖരിക്കുന്നത്. അനധികൃതമായി സമ്പാദിച്ച പണം ഉപയോഗിച്ച് വസ്തുവകകൾ വാങ്ങിയിട്ടുണ്ടോ എന്ന് കണ്ടെത്താനാണ് വിജിലൻസിന്റെ നീക്കം. കഴിഞ്ഞ ദിവസം തന്നെ വിജിലൻസ് സംഘം ചങ്ങനാശ്ശേരിയിൽ എത്തിയിരുന്നെങ്കിലും എൻഫോഴ്സ്മെന്റ് ഡയറക്ടറേറ്റിന്റെ പരിശോധന വീട്ടിൽ നടന്നിരുന്നതിനാൽ വിജിലൻസിന് അകത്തു കയറാൻ സാധിച്ചിരുന്നില്ല.
ഇഡി പരിശോധനകൾ പൂർത്തിയായ സാഹചര്യത്തിൽ മുരാരി ബാബുവിന്റെ വീട്ടിൽ വിജിലൻസ് സംഘം ഉടൻ തന്നെ റെയ്ഡ് നടത്തിയേക്കും. സ്വർണ്ണക്കൊള്ളയ്ക്ക് പുറമെ മുരാരി ബാബു വലിയ തോതിൽ സ്വത്ത് സമ്പാദിച്ചതായി പോലീസിന് നേരത്തെ വിവരം ലഭിച്ചിരുന്നു. ഇതേത്തുടർന്നാണ് സ്പെഷ്യൽ ടീമിനെ അന്വേഷണത്തിനായി നിയോഗിച്ചത്. വരും ദിവസങ്ങളിൽ കൂടുതൽ രേഖകൾ പരിശോധിക്കാനും മുരാരി ബാബുവിന്റെ ബിനാമി ഇടപാടുകളെക്കുറിച്ച് അന്വേഷിക്കാനുമാണ് വിജിലൻസ് സംഘത്തിന്റെ തീരുമാനം.
A special Vigilance team is investigating Murari Babu, who is currently in remand for the Sabarimala gold robbery case, over allegations of illegal asset accumulation. The team visited the Changanassery Municipality to collect records of his house and the Sub-Registrar's office for land transaction details. While the team arrived in Changanassery yesterday, they deferred their house raid due to an ongoing Enforcement Directorate (ED) search, but a full inspection of his residence is expected soon.