കൊച്ചി: വഖഫ് ഭൂമി വിഷയത്തിൽ മുനമ്പം ഭൂസംരക്ഷണ സമിതി നടത്തിവന്ന സമരം ഇന്ന് അവസാനിക്കും. ഉച്ചയ്ക്ക് 2:30 ന് വ്യവസായ മന്ത്രി പി. രാജീവും റവന്യൂ മന്ത്രി കെ. രാജനും സമരപ്പന്തലിലെത്തി നിലവിൽ സമരമിരിക്കുന്നവർക്ക് നാരാങ്ങാ നീര് നൽകി സമരം ഔദ്യോഗികമായി അവസാനിപ്പിക്കും.(Munambam land strike to end today, Minister P Rajeev and K Rajan will arrive at the place )
അതേസമയം, സമരസമിതിയിൽ ഭിന്നത രൂക്ഷമായി. ബിജെപി നേതൃത്വത്തിലുള്ള ഒരു വിഭാഗം ഈ തീരുമാനത്തോട് വിയോജിച്ച് നാളെ (ഡിസംബർ 1) മുതൽ വീണ്ടും സമരം ആരംഭിക്കാൻ തീരുമാനിച്ചു. വഖഫ് രജിസ്റ്ററിൽ നിന്ന് മുനമ്പത്തെ ഭൂമി പൂർണ്ണമായും ഒഴിവാക്കാനുള്ള നിയമനടപടി പൂർത്തിയാക്കാതെ സമരം അവസാനിപ്പിക്കുന്നത് ശരിയല്ലെന്നാണ് ഇവരുടെ പ്രധാന പ്രതിഷേധ കാരണം.
കഴിഞ്ഞ ദിവസത്തെ ഹൈക്കോടതി ഉത്തരവാണ് സമരം അവസാനിപ്പിക്കാൻ ഭൂരിപക്ഷം പേർ പങ്കാളികളായ ഭൂസംരക്ഷണ സമിതിയെ പ്രേരിപ്പിച്ചത്. വഖഫ് ബോർഡ് അവകാശവാദം ഉന്നയിച്ച ഭൂമിയിലെ താമസക്കാർക്ക് വ്യവസ്ഥകളോടെ ഭൂനികുതി അടയ്ക്കാൻ ഹൈക്കോടതി അനുമതി നൽകിയിരുന്നു. ഇതോടെ കുടുംബങ്ങൾക്ക് കരമടക്കാനും ഭൂമി പോക്കുവരവ് ചെയ്യാനും വഴിയൊരുങ്ങി.
ഹൈക്കോടതി ഉത്തരവിന്റെ പശ്ചാത്തലത്തിൽ, ജുഡീഷ്യൽ കമ്മീഷന്റെ പ്രശ്നപരിഹാരത്തിനും വഖഫ് ട്രൈബ്യൂണലിലെ അന്തിമ തീർപ്പിനുമായാണ് മുനമ്പം നിവാസികൾ ഇനി കാത്തിരിക്കുന്നത്.
കുടിയൊഴിപ്പിക്കില്ലെന്ന മുഖ്യമന്ത്രിയുടെ ഉറപ്പ്: കഴിഞ്ഞ ദിവസം മുനമ്പം ജനതയെ കുടിയിറക്കില്ലെന്ന മുഖ്യമന്ത്രിയുടെ ഉറപ്പ് പാലിക്കപ്പെട്ടെന്ന് മന്ത്രി പി. രാജീവ് അവകാശപ്പെട്ടിരുന്നു. വഖഫ് ബോർഡിന്റെ ആസ്തിക്കണക്കിൽ നിന്ന് വിവാദ ഭൂമി പൂർണ്ണമായും ഒഴിവാക്കും വരെ സമരം തുടരണമെന്ന ആവശ്യം ഒരു വിഭാഗം ഉന്നയിച്ചിരുന്നെങ്കിലും, കോർ കമ്മിറ്റി യോഗത്തിൽ സമരം അവസാനിപ്പിക്കാൻ അന്തിമ തീരുമാനമെടുക്കുകയായിരുന്നു.
രാജ്യത്ത് തന്നെ ചർച്ചയായ ഈ ഭൂസമരത്തിൽ ആദ്യഘട്ടത്തിൽ രാഷ്ട്രീയ ഭിന്നതകൾ പ്രകടമായിരുന്നില്ല. എന്നാൽ സമരം അവസാനിക്കുന്ന ഘട്ടത്തിൽ രാഷ്ട്രീയ ധ്രുവീകരണം വ്യക്തമാവുകയായിരുന്നു. സമര സമിതി കൺവീനർ ജോസഫ് ബെന്നിയെ തദ്ദേശ തെരഞ്ഞെടുപ്പിൽ യുഡിഎഫ് സ്ഥാനാർത്ഥിയായി മത്സരിപ്പിക്കാൻ കോൺഗ്രസ് നേതാക്കൾ ചർച്ചകൾ നടത്തിയെന്ന ആരോപണം ശക്തമാണ്.
സമരസമിതി നേതൃത്വം സംസ്ഥാന സർക്കാരുമായി അടുക്കുന്നുവെന്ന് വ്യക്തമായതോടെയാണ് ബിജെപി അനുകൂലികൾ കടുത്ത അതൃപ്തി രേഖപ്പെടുത്തിയത്. വഖഫ് ബോർഡിന്റെ ലാൻഡ് രജിസ്ട്രിയിൽ നിന്ന് 615 കുടുംബങ്ങളുടെ ഭൂമി പൂർണ്ണമായും ഒഴിവാക്കുന്നതുവരെ സമരവുമായി മുന്നോട്ട് പോകാനാണ് ബിജെപി അനുകൂല വിഭാഗത്തിന്റെ തീരുമാനം.