തിരുവനന്തപുരം: മുനമ്പത്തെ തർക്കഭൂമി വഖഫ് സ്വത്തല്ലെന്ന ഹൈക്കോടതി ഉത്തരവിനെതിരെ വഖഫ് സംരക്ഷണ വേദി നൽകിയ അപ്പീൽ ഹർജി സുപ്രീംകോടതി ഇന്ന് പരിഗണിക്കും. ജസ്റ്റിസ് മനോജ് മിശ്ര അധ്യക്ഷനായ ബെഞ്ചാണ് ഈ സുപ്രധാന ഹർജിയിൽ വാദം കേൾക്കുക. കേസുമായി ബന്ധപ്പെട്ട് സർക്കാർ നൽകിയ തടസ്സ ഹർജിയും കോടതി ഇതോടൊപ്പം പരിഗണിക്കുന്നുണ്ട്.(Munambam land dispute, Supreme Court to consider appeal against High Court order today)
വഖഫ് സംരക്ഷണ വേദിയുടെ പ്രധാന ആവശ്യം ഹൈക്കോടതിയുടെ ഉത്തരവ് സ്റ്റേ ചെയ്യണം എന്നതാണ്. മുനമ്പത്തെ ഭൂമി തർക്കം നിലവിൽ വഖഫ് ട്രൈബ്യൂണലിന്റെ പരിഗണനയിലിരിക്കുകയാണ്. അതിനാൽ, ട്രൈബ്യൂണലിന്റെ അധികാരപരിധിയിൽ വരുന്ന വിഷയത്തിൽ ഹൈക്കോടതിക്ക് ഉത്തരവിറക്കാൻ കഴിയില്ലെന്നാണ് അപ്പീലിലെ മുഖ്യ വാദം.
ഹൈക്കോടതിക്ക് മുൻപാകെ ഉണ്ടായിരുന്നത്, മുനമ്പം ഭൂമി തർക്കത്തിൽ ഒരു കമ്മീഷനെ നിയമിക്കാനാകുമോ എന്ന വിഷയം മാത്രമായിരുന്നു എന്നും ഹർജിക്കാർ ചൂണ്ടിക്കാട്ടുന്നു. മുനമ്പം ഭൂമി തർക്കത്തിൽ സുപ്രീംകോടതിയുടെ ഇന്നത്തെ തീരുമാനം അതീവ നിർണ്ണായകമാകും.