കൊച്ചി: ശ്രീനിവാസന്റെ നിര്യാണത്തോടെ തനിക്ക് നഷ്ടപ്പെട്ടത് തന്റെ ജീവിതത്തിന്റെ തന്നെ ഭാഗമായിരുന്ന ഒരു സുഹൃത്തിനെയാണെന്ന് മോഹൻലാൽ പറഞ്ഞു. വെറുമൊരു സഹപ്രവർത്തകൻ എന്നതിലുപരി ശ്രീനിവാസന്റെ കുടുംബവുമായി തനിക്ക് വലിയ ബന്ധമാണുള്ളതെന്ന് അദ്ദേഹം ഓർത്തെടുത്തു.
മോഹൻലാലിന്റെ വാക്കുകൾ:
സിനിമയെയും ജീവിതത്തെയും വളരെ വ്യത്യസ്തമായി കണ്ടിരുന്ന വ്യക്തിയായിരുന്നു ശ്രീനി. അദ്ദേഹത്തിന്റേതായ കാഴ്ചപ്പാടുകളും ശൈലിയും എടുത്തു പറയേണ്ടതാണ്. ഞങ്ങൾക്കിടയിൽ ഒരു പ്രത്യേക സൗഹൃദമുണ്ടായിരുന്നു. അത് ഒരു ആക്ടർ എന്ന നിലയിലുള്ള ബന്ധമായിരുന്നില്ല. ആ കുടുംബവുമായി എനിക്ക് അത്രമേൽ അടുപ്പമുണ്ട്.
ആ സുഹൃത്തിനെ നഷ്ടപ്പെടുക എന്ന് പറയുന്നത് താങ്ങാനാവാത്ത സങ്കടമാണ്. മലയാള സിനിമയ്ക്കും തനിക്കും ഇത് വലിയൊരു നഷ്ടം തന്നെയാണ്. മലയാളികൾ നെഞ്ചേറ്റിയ നിരവധി ഹിറ്റ് ചിത്രങ്ങളിൽ ഒന്നിച്ചഭിനയിച്ച ഈ കൂട്ടുകെട്ട് വെള്ളിത്തിരയ്ക്ക് പുറത്തും അത്രമേൽ തീക്ഷ്ണമായിരുന്നു. ശ്രീനിവാസന്റെ തിരക്കഥയിൽ മോഹൻലാൽ അനശ്വരമാക്കിയ കഥാപാത്രങ്ങൾ ഇന്നും മലയാളിക്ക് പ്രിയപ്പെട്ടതാണ്. തന്റെ പ്രിയപ്പെട്ട സുഹൃത്തിന്റെ വിയോഗത്തിൽ വാക്കുകൾ ഇടറിക്കൊണ്ടാണ് മോഹൻലാൽ പ്രതികരിച്ചത്.