തൃശൂർ: ഉത്സവപ്പറമ്പുകളിലെ പ്രിയങ്കരനും നിറസാന്നിധ്യവുമായിരുന്ന കൊമ്പൻ മാവേലിക്കര ഗണപതി ചരിഞ്ഞു. തൃശൂർ പഴഞ്ഞി പെങ്ങാമുക്ക് പെരുന്നാളിനായി കൊണ്ടുവന്ന ആന, ഇന്നലെ രാത്രിയോടെയാണ് യാത്രയായത്.(Mavelikkara Ganapati elephant has passed away)
പെരുന്നാളിന് ശേഷം പെങ്ങാമുക്ക് തെക്കുമുറി പറമ്പിൽ തളച്ചിരിക്കെയാണ് ഗജവീരൻ ചരിഞ്ഞത്. കഴിഞ്ഞ രണ്ടു ദിവസമായി എരണ്ടക്കെട്ടിനെ തുടർന്ന് ചികിത്സയിലായിരുന്നു മാവേലിക്കര ഗണപതി. ചികിത്സയിലിരിക്കെ ഇന്നലെ രാത്രിയോടെ മരണം സംഭവിക്കുകയായിരുന്നു.
മാവേലിക്കര ഗണപതിയുടെ വിയോഗ വാർത്തയറിഞ്ഞ് നിരവധി ആനപ്രേമികളാണ് സംഭവസ്ഥലത്തേക്ക് എത്തുന്നത്. കേരളത്തിലെ ഉത്സവ വേദികളിൽ തലയെടുപ്പും സൗന്ദര്യവും കൊണ്ട് ശ്രദ്ധേയനായിരുന്നു ഈ കൊമ്പൻ.