തിരുവനന്തപുരം: പിണറായി വിജയൻ വീണ്ടും അധികാരത്തിൽ വരുമെന്ന മണിശങ്കർ അയ്യരുടെ പ്രസ്താവനയെ തള്ളി കോൺഗ്രസ് നേതാവ് രമേശ് ചെന്നിത്തല. മണിശങ്കർ അയ്യർ കോൺഗ്രസിൽ ഇല്ലെന്നും, അദ്ദേഹത്തിന്റെ വാക്കുകൾക്ക് വില കൽപ്പിക്കുന്നില്ലെന്നും ചെന്നിത്തല പറഞ്ഞു.(Mani Shankar Aiyar is not in Congress, says Ramesh Chennithala)
മുഖ്യമന്ത്രി പിണറായി വിജയൻ പങ്കെടുത്ത ചടങ്ങിലേക്ക് ക്ഷണിച്ചതിലുള്ള ‘നന്ദി’ പ്രകടിപ്പിക്കാനാണ് അയ്യർ ഇത്തരമൊരു പ്രസ്താവന നടത്തിയത്. മുഖ്യമന്ത്രിയെ ഗാന്ധിയെന്ന് അയ്യർ വിശേഷിപ്പിച്ചില്ലല്ലോ എന്ന് ചെന്നിത്തല പരിഹസിച്ചു.
അയ്യർ കോൺഗ്രസ് പ്രവർത്തകനല്ലെന്ന് എഐസിസി വക്താവ് പവൻ ഖേര തന്നെ വ്യക്തമാക്കിയിട്ടുണ്ടെന്നും ചെന്നിത്തല കൂട്ടിച്ചേർത്തു. അതേസമയം, തന്റെ പ്രസ്താവനയിൽ ഉറച്ചുനിൽക്കുന്നതായി മണിശങ്കർ അയ്യർ ഡൽഹിയിൽ പ്രതികരിച്ചു. കോൺഗ്രസ് നേതാക്കൾക്കെതിരെ അദ്ദേഹം രൂക്ഷവിമർശനമാണ് ഉയർത്തിയത്. തന്നെ വിമർശിച്ച പവൻ ഖേര രാഹുൽ ഗാന്ധിയുടെ പാവയാണെന്ന് അയ്യർ ആരോപിച്ചു. കേരളത്തിലെ കോൺഗ്രസ് നേതാക്കൾക്ക് പരസ്പരം കണ്ടുകൂടാത്ത അവസ്ഥയാണെന്നും അദ്ദേഹം കുറ്റപ്പെടുത്തി.
