വയനാട്: പ്രതിപക്ഷ നേതാവ് വി.ഡി. സതീശൻ നയിക്കുന്ന പുതുയുഗയാത്രയുടെ വയനാട് ജില്ലയിലെ സ്വീകരണ പരിപാടിക്കിടെ സ്ഥാപിച്ച ഫ്ലെക്സ് ബോർഡ് വിവാദമായി. യുഡിഎഫിന്റെ രാഷ്ട്രീയ യാത്രയ്ക്ക് ‘ആശംസകളോടെ മാനന്തവാടി നഗരസഭ’ എന്ന പേരിൽ ബോർഡുകൾ സ്ഥാപിച്ചതാണ് ഡിവൈഎഫ്ഐയുടെ പ്രതിഷേധത്തിന് ഇടയാക്കിയത്.(Mananthavady Municipality wishes good luck on VD Satheesan’s Kerala tour, DYFI protests)
യാത്രയുടെ സ്വീകരണത്തിന്റെ ഭാഗമായി നഗരത്തിൽ സ്ഥാപിച്ച ബോർഡുകളിൽ നഗരസഭയുടെ പേര് ഔദ്യോഗികമായി ഉൾപ്പെടുത്തിയിരുന്നു. ഒരു ഭരണഘടനാ സ്ഥാപനത്തിന്റെ പേര് രാഷ്ട്രീയ പരിപാടിക്ക് ഉപയോഗിച്ചത് നിയമവിരുദ്ധമാണെന്ന് ഡിവൈഎഫ്ഐ ആരോപിച്ചു.
നഗരസഭയുടെ പേര് ദുരുപയോഗം ചെയ്തവർക്കെതിരെ നടപടി ആവശ്യപ്പെട്ട് ഡിവൈഎഫ്ഐ പ്രവർത്തകർ നഗരസഭാ സെക്രട്ടറിയെ ഉപരോധിച്ചു. സെക്രട്ടറിയുടെ ചേംബറിനുള്ളിൽ നടന്ന പ്രതിഷേധം നഗരസഭാ പ്രവർത്തനങ്ങളെ അൽപ്പനേരം തടസ്സപ്പെടുത്തി. പ്രതിഷേധം ശക്തമായതോടെയും പരാതി ഔദ്യോഗികമായി സ്വീകരിച്ചതോടെയും യുഡിഎഫ് നേതൃത്വം ബോർഡുകളിൽ മാറ്റം വരുത്തി.
