റിപ്പോർട്ട് : അൻവർ ഷരീഫ്
മലപ്പുറം : കട്ടൻ ചായയിൽ വിഷം കലർത്തി കൊല്ലാൻ ശ്രമിച്ച കേസിൽ യുവാവ് അറസ്റ്റിൽ. കളപ്പാട്ടുക്കുന്ന് തോങ്ങോട്ട് വീട്ടിൽ അജയിയെ (24 ) ആണ് വണ്ടൂർ പോലീസ് അറസ്റ്റ് ചെയ്തത്. മുൻ വൈരാഗ്യമാണ് കാരണം.(Man tries to kill his friend by poisoning him)
ഈ മാസം 10 നും, 14 നുമാണ് കേസിനാസ്പദമായ സംഭവം നടന്നത്. പരാതിക്കാരനായ കാരാട് വടക്കുംപാടം കുറുമ്പൊയിൽ ചെണ്ണെൻ വീട്ടിൽ സുന്ദരന്റെ കാരാട് കുറുമ്പൊയിലുള്ള ജോലി സ്ഥലത്ത് വെച്ച് ബൈക്കിൽ സൂക്ഷിച്ചിരുന്ന ഫ്ലാസ്കിലെ കട്ടൻ ചായയിൽ വിഷം കലർത്തിയെന്നാണ് കേസ്. റബ്ബർ ടാപ്പിംഗ് തൊഴിലാളിയായ സുന്ദരൻ ബൈക്കിലെ ഫ്ലാസ്കിൽ കട്ടൻ ചായ സൂക്ഷിച്ച് വെക്കാറുണ്ട്. ഇതിൽ രണ്ട് ദിവസങ്ങളിലായാണ് വിഷം കലർത്തിയിരുന്നത്.
പോലീസിൽ നൽകിയ പരാതിയെ തുടർന്ന് നടത്തിയ അന്വേഷണത്തിലാണ് അജയ് പിടിയിലായത്. പ്രതി കുറ്റം സമ്മതിച്ചതായും, പരാതിക്കാരനോടുള്ള മുൻ വൈരാഗ്യമാണ് കൃത്യത്തിന് പ്രേരിപ്പിച്ചതെന്നും പോലീസ് പറഞ്ഞു. പെരിന്തൽമണ്ണ കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു