കോഴിക്കോട്: മാമി തിരോധാനക്കേസിലെ അന്വേഷണത്തിൽ തങ്ങളുടെ ഭാഗത്തുനിന്ന് വീഴ്ചയുണ്ടായിട്ടില്ലെന്ന് ആദ്യ അന്വേഷണ സംഘം വകുപ്പ് തല അന്വേഷണം നടത്തിയ അസിസ്റ്റന്റ് കമ്മീഷണർക്ക് വിശദീകരണം നൽകി. സി.സി.ടി.വി. ദൃശ്യങ്ങൾ പരിശോധിക്കുന്നതിൽ ഉൾപ്പെടെ മനപ്പൂർവമായ വീഴ്ച വരുത്തിയിട്ടില്ലെന്നാണ് നടക്കാവ് പോലീസ് സ്റ്റേഷനിലെ മുൻ ഉദ്യോഗസ്ഥർ പറയുന്നത്.(Mami disappearance case, Investigation team says there was no lapse in the investigation)
മാമി തിരോധാന കേസിന്റെ അന്വേഷണത്തിൽ ലോക്കൽ പോലീസിന് വീഴ്ച പറ്റിയെന്നായിരുന്നു ക്രൈംബ്രാഞ്ച് എ.ഡി.ജി.പി.യുടെ റിപ്പോർട്ട്. ഇതിന്റെ അടിസ്ഥാനത്തിൽ ഉത്തരമേഖലാ ഐ.ജി. രാജ്പാൽ മീണ വകുപ്പ് തല അന്വേഷണത്തിന് ഉത്തരവിട്ടിരുന്നു. ലോക്കൽ പോലീസിന് സംഭവിച്ച വീഴ്ചകളായി വകുപ്പ് തല റിപ്പോർട്ടിൽ പ്രധാനമായും ചൂണ്ടിക്കാട്ടിയത് മാമിയെ അവസാനമായി കണ്ട അരയിടത്തു പാലം സി.ഡി. ടവറിലെ സി.സി.ടി.വി. ദൃശ്യങ്ങൾ പരിശോധിച്ചില്ല, മാമിയുടെ ഡ്രൈവറുടെ വീട്ടിലെ സി.സി.ടി.വി. ദൃശ്യങ്ങൾ ആദ്യ സമയത്ത് പരിശോധിക്കുന്നതിൽ വീഴ്ച സംഭവിച്ചു എന്നിവയാണ്. നടുക്കാവ് മുൻ എസ്.എച്ച്.ഒ. പി.കെ. ജീജീഷ്, എസ്.ഐ. ബിനു മോഹൻ, സീനിയർ സി.പി.ഒമാരായ ശ്രീകാന്ത്, കെ.കെ. ബിജു എന്നിവർക്കെതിരെയായിരുന്നു റിപ്പോർട്ടിലെ പരാമർശം.
മാമിയെ അവസാനമായി കണ്ട അരയിടത്തുപാലത്തെ സി.സി.ടി.വി. ദൃശ്യങ്ങൾ ആദ്യ ഘട്ടത്തിൽ പരിശോധിച്ചിരുന്നു. എന്നാൽ ഉപകാരപ്രദമായ ദൃശ്യങ്ങളൊന്നും ലഭിച്ചില്ല. സി.ഡി. ടവറിൽ സി.സി.ടി.വി. ഉണ്ടായിരുന്നെങ്കിലും അത് പ്രവർത്തനക്ഷമമായിരുന്നില്ല. കാണാതാവുന്നതിന് മുമ്പ് മാമിയെത്തിയ സൗത്ത് ബീച്ചിലെ കെട്ടിടത്തിന് സമീപമുള്ള മെഡിക്കൽ ഷോപ്പിലെ സി.സി.ടി.വി. പരിശോധിച്ചെങ്കിലും റിപ്പയറിംഗിനായി കണക്ഷൻ ഊരിവെച്ചതിനാൽ ദൃശ്യങ്ങൾ ഉണ്ടായിരുന്നില്ല.
മാമിയുടെ ഡ്രൈവർ വിശ്വസ്തനാണെന്ന് കുടുംബം പറഞ്ഞതിനാലാണ് ഇയാളുടെ വീട്ടിലെ സി.സി.ടി.വി. ആദ്യ ഘട്ടത്തിൽ പരിശോധിക്കാതിരുന്നത്. ആദ്യ ഘട്ടത്തിൽ 69-ലധികം സി.സി.ടി.വി. ദൃശ്യങ്ങൾ പരിശോധിച്ചു. ആദ്യഘട്ട അന്വേഷണത്തിൽ ഉന്നത ഉദ്യോഗസ്ഥർ വീഴ്ചകളൊന്നും ചൂണ്ടിക്കാട്ടിയിട്ടില്ലെന്നും വിശദീകരണത്തിൽ പറയുന്നു.
അന്വേഷണ ഉദ്യോഗസ്ഥരുടെ വിശദീകരണമടക്കം പരിഗണിച്ചാകും ഉത്തരമേഖലാ ഐ.ജി. രാജ്പാൽ മീണ തുടർനടപടി സ്വീകരിക്കുക. 2023 ഓഗസ്റ്റ് 21നാണ് മാമിയെ കോഴിക്കോട് നിന്നും കാണാതാകുന്നത്. ലോക്കൽ പോലീസും പ്രത്യേക അന്വേഷണ സംഘവും അന്വേഷിച്ച കേസ് ഇപ്പോൾ ക്രൈംബ്രാഞ്ചാണ് കൈകാര്യം ചെയ്യുന്നത്.