കാൺപൂർ: ഉത്തർപ്രദേശിലെ കാൺപൂരിൽ മതപരിവർത്തനം ആരോപിച്ച് മലയാളി പാസ്റ്ററെ പോലീസ് അറസ്റ്റ് ചെയ്തു. തിരുവനന്തപുരം സ്വദേശിയായ ആൽബിനെതിരെയാണ് (35) ബജ്രംഗ്ദൾ പ്രവർത്തകരുടെ പരാതിയിൽ കേസെടുത്തത്. നിലവിൽ കാൺപൂരിലെ ജയിലിലാണ് ഇദ്ദേഹം.
ബജ്രംഗ്ദൾ പ്രവർത്തകർ പോലീസിൽ നൽകിയ പരാതിയിൽ പ്രധാനമായും മൂന്ന് കാര്യങ്ങളാണ് ഉന്നയിച്ചിരിക്കുന്നത്. ആൽബിൻ സ്വന്തം വീട് പള്ളിയാക്കി മാറ്റുകയും അവിടെ ആളുകളെ എത്തിച്ച് നിർബന്ധിത മതപരിവർത്തനം നടത്തുകയും ചെയ്തു. മതപരിവർത്തനത്തെ ചോദ്യം ചെയ്ത തങ്ങളെ പാസ്റ്റർ ശാരീരികമായി ആക്രമിച്ചു. തങ്ങൾക്കെതിരെ പാസ്റ്റർ അസഭ്യവർഷം നടത്തിയെന്നും പരാതിയിൽ പറയുന്നു.
ജനുവരി 13-നാണ് പരാതിയുടെ അടിസ്ഥാനത്തിൽ പാസ്റ്റർ ആൽബിനെ പോലീസ് കസ്റ്റഡിയിലെടുത്തത്. ഉത്തർപ്രദേശിലെ കർശനമായ മതപരിവർത്തന നിരോധന നിയമത്തിലെ വിവിധ വകുപ്പുകളും മറ്റ് ജാമ്യമില്ലാ വകുപ്പുകളും പ്രകാരമാണ് കേസെടുത്തിരിക്കുന്നത്. പ്രാദേശിക കോടതിയിൽ ഹാജരാക്കിയ ഇദ്ദേഹത്തെ റിമാൻഡ് ചെയ്തു.
അതേസമയം, പാസ്റ്റർ ആൽബിന്റെ കുടുംബമോ ബന്ധപ്പെട്ട സഭാ വൃത്തങ്ങളോ ആരോപണങ്ങളെക്കുറിച്ച് ഔദ്യോഗികമായി പ്രതികരിച്ചിട്ടില്ല. കാൺപൂരിലെ മലയാളി സംഘടനകൾ വിഷയം നിരീക്ഷിച്ചുവരികയാണ്.