കൊച്ചി: ജോർജിയയിൽ മെഡിക്കൽ വിദ്യാർത്ഥിനിയായ മലയാളി യുവതി പനി ബാധിച്ച് ചികിത്സയിലിരിക്കെ മരിച്ചു. ആലുവ തായ്ക്കാട്ടുകര എസ്.എൻ പുരം സ്വദേശിനി സോണ (21) ആണ് മരിച്ചത്. കടുത്ത പനി ബാധിച്ച് കോമയിലായ സോണയെ നാട്ടിലെത്തിക്കാനുള്ള ശ്രമങ്ങൾ തുടരുന്നതിനിടെയായിരുന്നു അന്ത്യം.
അഞ്ച് ദിവസം മുൻപാണ് സോണയ്ക്ക് കടുത്ത പനി ബാധിച്ചത്. തുടർന്ന് ജോർജിയയിലെ ആശുപത്രിയിൽ ചികിത്സ തേടിയെങ്കിലും ആരോഗ്യനില വഷളാവുകയും കോമയിലാവുകയുമായിരുന്നു. ആലുവ തായ്ക്കാട്ടുകര എസ്.എൻ പുരം സ്വദേശികളായ റോയ് - ജിജി ദമ്പതികളുടെ മകളാണ് സോണ.
സോണയുടെ നില ഗുരുതരമായതിനെ തുടർന്ന് വിദഗ്ധ ചികിത്സയ്ക്കായി നാട്ടിലെത്തിക്കാൻ കുടുംബവും സുഹൃത്തുക്കളും നോർക്ക (NORKA) വഴി തീവ്രശ്രമം നടത്തിവരികയായിരുന്നു. എന്നാൽ ചൊവ്വാഴ്ചയോടെ മരണം സംഭവിക്കുകയായിരുന്നു.
മൃതദേഹം നാട്ടിലെത്തിക്കുന്നതിനുള്ള നടപടിക്രമങ്ങൾ ജോർജിയയിലെ ഇന്ത്യൻ എംബസിയുടെ സഹായത്തോടെ പുരോഗമിക്കുകയാണ്. മിടുക്കിയായ ഒരു മെഡിക്കൽ വിദ്യാർത്ഥിനിയുടെ അപ്രതീക്ഷിത വിയോഗം നാടിനെയാകെ ദുഃഖത്തിലാഴ്ത്തി.