തിരുവനന്തപുരം: മാവേലിക്കര – ചെങ്ങന്നൂർ സെക്‌ഷനിലെ പാലത്തിൽ അറ്റകുറ്റപ്പണികൾ നടക്കുന്നതിനാൽ നാളെയും (ശനി, നവംബർ 22) മറ്റന്നാളും (ഞായർ, നവംബർ 23) ട്രെയിൻ ഗതാഗതത്തിൽ നിയന്ത്രണം ഏർപ്പെടുത്തി. നാളെ (നവംബർ 22) പുറപ്പെടേണ്ട കൊല്ലം ജങ്‌ഷൻ – എറണാകുളം ജങ്‌ഷൻ എക്‌സ്‌പ്രസ് റദ്ദാക്കി.(Maintenance on Mavelikkara – Chengannur section, Train traffic restricted)
മധുര – ഗുരുവായൂർ എക്‌സ്‌പ്രസ് കൊല്ലത്ത് യാത്ര അവസാനിപ്പിക്കും. നാഗർകോവിൽ – കോട്ടയം എക്‌സ്‌പ്രസ് കായംകുളത്ത് യാത്ര അവസാനിപ്പിക്കും. ചെന്നൈ സെൻട്രൽ – തിരുവനന്തപുരം സെൻട്രൽ സൂപ്പർഫാസ്‌റ്റ് കോട്ടയത്ത് യാത്ര അവസാനിപ്പിക്കും.
ഞായറാഴ്‌ച (നവംബർ 23) പുറപ്പെടേണ്ട ഗുരുവായൂർ – മധുര എക്‌സ്‌പ്രസ് കൊല്ലത്തുനിന്നായിരിക്കും പുറപ്പെടുക. തിരുവനന്തപുരം സെൻട്രൽ – ചെന്നൈ സെൻട്രൽ സൂപ്പർഫാസ്‌റ്റ് ആലപ്പുഴ വഴി തിരിച്ചുവിടും. ചേർത്തല, എറണാകുളം ജങ്‌ഷൻ എന്നിവിടങ്ങളിൽ സ്‌റ്റോപ്പുണ്ടാകും.
ആലപ്പുഴ വഴി തിരിച്ചുവിടുന്ന മറ്റ് ട്രെയിനുകൾ:
തിരുവനന്തപുരം നോർത്ത്‌ – ശ്രീ ഗംഗാനഗർ പ്രതിവാര എക്‌സ്‌പ്രസ്.
തിരുവനന്തപുരം നോർത്ത്‌ – ലോക്‌മാന്യ തിലക്‌ ടെർമിനസ്‌ പ്രതിവാര സ്‌പെഷ്യൽ.
തിരുവനന്തപുരം നോർത്ത്‌ – എസ്‌.എം.വി.ടി. ബംഗളൂരു ഹംസഫർ എക്‌സ്‌പ്രസ്.
ഞായറാഴ്‌ച പുറപ്പെടേണ്ട തിരുവനന്തപുരം സെൻട്രൽ – എറണാകുളം വഞ്ചിനാട്‌ എക്‌സ്‌പ്രസ്, കൊല്ലം ജങ്‌ഷൻ – എറണാകുളം ജങ്‌ഷൻ മെമു എന്നിവ അര മണിക്കൂർ വൈകിയോടും. മറ്റ് നിരവധി ട്രെയിനുകളെയും ഗതാഗത നിയന്ത്രണം ബാധിക്കാൻ സാധ്യതയുള്ളതിനാൽ, യാത്രക്കാർ റെയിൽ വൺ ആപ്പിൽ സമയം ഉറപ്പാക്കിയ ശേഷം മാത്രം യാത്ര പുറപ്പെടണമെന്ന് അധികൃതർ അറിയിച്ചു.