തിരുവനന്തപുരം: തദ്ദേശ സ്വയംഭരണ തിരഞ്ഞെടുപ്പിലുണ്ടായ തിരിച്ചടിയിൽ സി.പി.ഐ.എം കേരള ഘടകത്തിന് കേന്ദ്ര കമ്മിറ്റിയുടെ രൂക്ഷവിമർശനം. പാർട്ടിക്കുണ്ടായ അമിത ആത്മവിശ്വാസമാണ് പരാജയത്തിന് പ്രധാന കാരണമെന്ന് യോഗം വിലയിരുത്തി. തിരുവനന്തപുരം വിളപ്പിൽശാലയിലെ ഇ.എം.എസ് അക്കാദമിയിൽ മൂന്ന് ദിവസമായി നടന്നുവന്ന കേന്ദ്ര കമ്മിറ്റി യോഗം ഇന്ന് സമാപിക്കും.(Local body election defeat, Central Committee criticizes CPIM Kerala unit)
തിരഞ്ഞെടുപ്പിൽ വിജയം സുനിശ്ചിതമാണെന്ന അമിത ആത്മവിശ്വാസം പാർട്ടി പ്രവർത്തകർക്കിടയിൽ ഉണ്ടായിരുന്നു. ഇത് താഴെത്തട്ടിലെ പ്രവർത്തനങ്ങളെ മന്ദീഭവിപ്പിച്ചുവെന്ന് സി.സി വിലയിരുത്തി. താഴെത്തട്ടിലെ സംഘടനാ സംവിധാനം കൃത്യമായി ചലിച്ചില്ലെന്നതാണ് മറ്റൊരു പ്രധാന കുറ്റപ്പെടുത്തൽ. സർക്കാരിന്റെ ക്ഷേമപദ്ധതികളിൽ മാത്രം വിശ്വസിച്ച് സംഘടനാപരമായ പ്രവർത്തനങ്ങളിൽ വീഴ്ച വരുത്തിയത് തിരിച്ചടിയായി.
സർക്കാർ പ്രഖ്യാപിച്ച ക്ഷേമപദ്ധതികൾ ജനങ്ങളിലേക്ക് എത്തുമെന്നും വോട്ടായി മാറുമെന്നും പാർട്ടി കണക്കുകൂട്ടി. എന്നാൽ, രാഷ്ട്രീയമായ സംഘാടനത്തിന് പകരം ഭരണനേട്ടങ്ങളിൽ മാത്രം ശ്രദ്ധ കേന്ദ്രീകരിച്ചത് തിരഞ്ഞെടുപ്പ് ഫലത്തെ ബാധിച്ചു.
ബംഗാളിലെ കോൺഗ്രസ് - സി.പി.ഐ.എം സഖ്യത്തെക്കുറിച്ചും കേന്ദ്ര കമ്മിറ്റിയിൽ ഗൗരവമായ ചർച്ചകൾ നടന്നു. സഖ്യത്തിന്റെ കാര്യത്തിൽ ഇപ്പോഴും വലിയ അവ്യക്തത നിലനിൽക്കുന്നുണ്ട്. സഖ്യത്തെക്കുറിച്ച് കോൺഗ്രസ് കേന്ദ്ര നേതൃത്വം മൗനം പാലിക്കുകയാണെന്നും അനുകൂല പ്രതികരണങ്ങൾ ഉണ്ടാകുന്നില്ലെന്നും ബംഗാൾ ഘടകം യോഗത്തിൽ കുറ്റപ്പെടുത്തി.
അഞ്ച് സംസ്ഥാനങ്ങളിൽ നിയമസഭാ തിരഞ്ഞെടുപ്പ് നടക്കാനിരിക്കെ, കേരളത്തിലെയും ബംഗാളിലെയും ഈ പോരായ്മകൾ പരിഹരിച്ച് മുന്നോട്ട് പോകാനാണ് പാർട്ടി നേതൃത്വത്തിന്റെ തീരുമാനം. കേരളം ഉൾപ്പെടെ അഞ്ച് സംസ്ഥാനങ്ങളിൽ നിയമസഭാ തിരഞ്ഞെടുപ്പ് നടക്കാനിരിക്കെ, സി.പി.എം കേന്ദ്രകമ്മിറ്റി യോഗം ഇന്ന് സമാപിക്കും. സ്ഥാനാർത്ഥി നിർണ്ണയത്തിലെ മാനദണ്ഡങ്ങളും കേന്ദ്ര സർക്കാരിനെതിരായ സമരപരിപാടികളുമാണ് സമാപന ദിവസമായ ഇന്ന് പ്രധാനമായും ചർച്ച ചെയ്യുന്നത്. തിരുവനന്തപുരം വിളപ്പിൽശാലയിലെ ഇ.എം.എസ് അക്കാദമിയിലാണ് മൂന്ന് ദിവസത്തെ യോഗം നടക്കുന്നത്.
രണ്ടുതവണ തുടർച്ചയായി എം.എൽ.എ ആയവർക്ക് ഇളവ് നൽകണമോ എന്ന കാര്യത്തിൽ യോഗം അന്തിമ തീരുമാനമെടുക്കും. ഇതിനായി പ്രത്യേക മാർഗരേഖ കേന്ദ്രകമ്മിറ്റി തയ്യാറാക്കാൻ സാധ്യതയുണ്ട്. രണ്ട് ടേം നിബന്ധനയിൽ ഇളവ് അനുവദിച്ചാൽ മുഖ്യമന്ത്രി പിണറായി വിജയൻ വീണ്ടും ജനവിധി തേടുമോ എന്ന കാര്യത്തിൽ ഏകദേശ ചിത്രം ഇന്ന് വ്യക്തമാകും.
കേരളത്തിന് പുറമെ പശ്ചിമ ബംഗാൾ, തമിഴ്നാട്, അസം, പുതുച്ചേരി എന്നിവിടങ്ങളിലെ തിരഞ്ഞെടുപ്പ് ഒരുക്കങ്ങളും സഖ്യസാധ്യതകളും യോഗം വിലയിരുത്തും. കേന്ദ്ര സർക്കാരിന്റെ ജനദ്രോഹ നയങ്ങൾക്കെതിരെ ദേശീയതലത്തിൽ സംഘടിപ്പിക്കേണ്ട സമരപരിപാടികൾക്ക് യോഗം രൂപം നൽകും. സംസ്ഥാന കമ്മിറ്റികൾ നൽകിയ റിപ്പോർട്ടുകളുടെ അടിസ്ഥാനത്തിൽ തിരഞ്ഞെടുപ്പ് വിജയത്തിനായുള്ള കൃത്യമായ മാർഗനിർദ്ദേശങ്ങൾ കേന്ദ്ര നേതൃത്വം ഇന്ന് പുറപ്പെടുവിക്കും.