പാലക്കാട്: മലമ്പുഴയിൽ പുലിയെ കണ്ടതിനെ തുടർന്ന് പ്രദേശത്ത് അധികൃതർ ജാഗ്രതാ നിർദ്ദേശം നൽകി. മലമ്പുഴ അകത്തേത്തറ, കെട്ടേക്കാട് വനം റേഞ്ച് പരിധിയിൽ രാത്രി യാത്ര ചെയ്യുന്നവർക്കാണ് പ്രധാനമായും ജാഗ്രതാ നിർദ്ദേശം നൽകിയിട്ടുള്ളത്.
അനാവശ്യ യാത്രകൾ പൂർണ്ണമായും ഒഴിവാക്കണമെന്ന് പോലീസും വനം വകുപ്പും സംയുക്തമായി നിർദ്ദേശം നൽകി.പ്രദേശത്ത് 24 മണിക്കൂറും നിരീക്ഷണം നടത്തുന്നതിനായി വനം വകുപ്പ് രണ്ട് പ്രത്യേക സ്‌ക്വാഡുകളെ നിയോഗിച്ചിട്ടുണ്ട്. മലമ്പുഴ സർക്കാർ സ്കൂൾ പരിസരത്തും ജയിൽ ക്വാർട്ടേഴ്‌സിനായി ഏറ്റെടുത്ത സ്ഥലത്തും രാവിലെ സംഘം വിശദമായ പരിശോധന നടത്തിയിരുന്നു. പുലിയെ കണ്ടെന്ന് അറിയിച്ച ആളിൽ നിന്ന് വനംവകുപ്പ് കൂടുതൽ വിവരങ്ങൾ തേടിയിട്ടുണ്ട്.
പുലിയുടെ സാന്നിധ്യം സ്ഥിരീകരിച്ചതോടെ ജനങ്ങൾ അതീവ ജാഗ്രത പാലിക്കണമെന്ന് അധികൃതർ അറിയിച്ചു.