തിരുവനന്തപുരം: കേരളത്തോടുള്ള കേന്ദ്ര സർക്കാരിന്റെ സാമ്പത്തിക ഉപരോധത്തിനും ജനവിരുദ്ധ നയങ്ങൾക്കുമെതിരെ ശക്തമായ പ്രതിഷേധ പരിപാടികളുമായി ഇടതുമുന്നണി. ഇതിന്റെ ഭാഗമായി സംസ്ഥാന വ്യാപകമായി മൂന്ന് മേഖലകളിലായി രാഷ്ട്രീയ ജാഥകൾ സംഘടിപ്പിക്കുമെന്ന് എൽഡിഎഫ് കൺവീനർ ടി.പി. രാമകൃഷ്ണൻ അറിയിച്ചു.
കേരളത്തിന്റെ വികസന നേട്ടങ്ങൾ ജനങ്ങളിലെത്തിക്കാനും കേന്ദ്രത്തിന്റെ ഗൂഢനീക്കങ്ങൾ തുറന്നുകാട്ടാനുമാണ് ജാഥകൾ ലക്ഷ്യമിടുന്നത്. സി.പി.ഐ.എം സംസ്ഥാന സെക്രട്ടറി എം.വി. ഗോവിന്ദൻ വടക്കൻ മേഖലാ ജാഥ നയിക്കും. മധ്യമേഖലാ ജാഥ കേരള കോൺഗ്രസ് (എം) ചെയർമാൻ ജോസ് കെ. മാണിയും, തെക്കൻ മേഖലാ ജാഥ സി.പി.ഐ സംസ്ഥാന സെക്രട്ടറി ബിനോയ് വിശ്വവും നയിക്കും.
ജനുവരി 12-ന് മന്ത്രിമാരുടെ പ്രതിഷേധം
കേന്ദ്ര സർക്കാർ ഏകപക്ഷീയമായി ഫണ്ട് വെട്ടിക്കുറയ്ക്കുന്നതിനെതിരെ ജനുവരി 12-ന് തിരുവനന്തപുരം പാളയം രക്തസാക്ഷി മണ്ഡപത്തിന് മുന്നിൽ സംസ്ഥാനത്തെ മന്ത്രിമാരും എംഎൽഎമാരും പ്രതിഷേധ സമരം നടത്തും. രാവിലെ 10 മുതൽ വൈകുന്നേരം 5 വരെയാണ് സമരം.
കേന്ദ്രം വെട്ടിക്കുറച്ച പ്രധാന തുകകൾ:
കേരളത്തിന് ലഭിക്കേണ്ട 6947.36 കോടി രൂപ കേന്ദ്രം കുടിശികയാക്കി വെച്ചിരിക്കുകയാണെന്ന് കൺവീനർ ചൂണ്ടിക്കാട്ടി. പ്രധാന ഇനങ്ങൾ താഴെ:
നെല്ല് സംഭരണ ഇൻസെന്റീവ്: 1334 കോടി രൂപ.
എസ്.എസ്.എ (വിദ്യാഭ്യാസം): 1066.36 കോടി രൂപ.
സാമൂഹിക സുരക്ഷാ പെൻഷൻ (കേന്ദ്ര വിഹിതം): 341 കോടി രൂപ.
ജലജീവൻ മിഷൻ: 650 കോടി രൂപ.
തൊഴിലുറപ്പ് പദ്ധതി ബാധ്യത: 3544 കോടി രൂപ.
സാമ്പത്തിക പ്രതിസന്ധികൾക്കിടയിലും ജനങ്ങളുടെ പ്രശ്നങ്ങൾ പരിഹരിക്കാനാണ് സർക്കാർ ശ്രമിക്കുന്നതെന്നും, വർഗീയമായി ജനങ്ങളെ ഭിന്നിപ്പിക്കാനുള്ള നീക്കങ്ങളെ രാഷ്ട്രീയമായി നേരിടുമെന്നും ടി.പി. രാമകൃഷ്ണൻ വ്യക്തമാക്കി. ഇടതുമുന്നണിയിൽ യാതൊരുവിധ അഭിപ്രായ ഭിന്നതകളുമില്ലെന്നും അദ്ദേഹം കൂട്ടിച്ചേർത്തു.