കോട്ടയം: നിയമസഭാ തെരഞ്ഞെടുപ്പ് ലക്ഷ്യമിട്ട് താഴെത്തട്ടിൽ പ്രചാരണം ശക്തമാക്കാൻ എൽ.ഡി.എഫ്. മുന്നണിയിലെ മുഴുവൻ എം.എൽ.എമാരെയും അണിനിരത്തി ഓരോ നിയോജക മണ്ഡലത്തിലും പ്രത്യേക ജാഥകൾ സംഘടിപ്പിക്കും. മുഖ്യമന്ത്രി പിണറായി വിജയൻ ധർമടം മണ്ഡലത്തിൽ ജാഥാ ക്യാപ്റ്റനാകും. മന്ത്രിമാർ അവരുടെ മണ്ഡലങ്ങളിലും ജാഥ നയിക്കും.
പ്രധാന തീരുമാനങ്ങൾ:
മണ്ഡലം ജാഥകൾ: മൂന്ന് ദിവസത്തെ വാഹന പ്രചാരണ ജാഥകളാണ് ഓരോ മണ്ഡലത്തിലും സംഘടിപ്പിക്കുന്നത്. എൽ.ഡി.എഫിന്റെ സംസ്ഥാന-മേഖലാ ജാഥകൾക്ക് പുറമെയാണിത്.
നേതൃത്വം: എം.എൽ.എമാർ ക്യാപ്റ്റന്മാരാകുമ്പോൾ ഘടകകക്ഷി നേതാക്കൾ വൈസ് ക്യാപ്റ്റൻ, മാനേജർ പദവികളിൽ എത്തും.
പ്രതിപക്ഷ മണ്ഡലങ്ങൾ: യു.ഡി.എഫ് എം.എൽ.എമാരുള്ള മണ്ഡലങ്ങളിൽ കഴിഞ്ഞ തവണ മത്സരിച്ച ഇടത് സ്ഥാനാർത്ഥികളോ ജില്ലാ നേതൃത്വം നിശ്ചയിക്കുന്ന പ്രമുഖ നേതാക്കളോ ജാഥയ്ക്ക് നേതൃത്വം നൽകും.
ലക്ഷ്യം: സംസ്ഥാന സർക്കാരിന്റെ വികസന നേട്ടങ്ങൾ നേരിട്ട് ജനങ്ങളിലെത്തിക്കുക എന്നതാണ് ജാഥയുടെ പ്രധാന ഉദ്ദേശ്യം.
സി.പി.എം, എൽ.ഡി.എഫ് യോഗങ്ങളിൽ മുഖ്യമന്ത്രി തന്നെയാണ് ഈ നിർദ്ദേശം മുന്നോട്ടുവെച്ചത്. സംസ്ഥാന-മേഖലാ ജാഥകൾക്ക് മുൻപോ ശേഷമോ ഈ മണ്ഡലം ജാഥകൾ പൂർത്തിയാക്കാനാണ് നിർദ്ദേശം. വികസന നേട്ടങ്ങൾക്കൊപ്പം കേന്ദ്ര സർക്കാരിന്റെ കേരളത്തോടുള്ള അവഗണനയും ജാഥകളിൽ പ്രധാന ചർച്ചാവിഷയമാകും.