സ്ത്രീകൾക്ക് സുരക്ഷിതമായി തൊഴിലെടുക്കാൻ നിയമ നിർമാണം നടത്തുമെന്ന് മന്ത്രി സജി ചെറിയാൻ. അന്താരാഷ്ട്ര ചലച്ചിത്രോൽസവത്തോടനുബന്ധിച്ച് തിരുവനന്തപുരത്ത് മുതിർന്ന ചലച്ചിത്ര നടിമാരെ ആദരിക്കുന്നതിനായി നടത്തിയ 'മറക്കില്ലൊരിക്കലും' എന്ന പരിപാടിയിൽ പങ്കെടുത്ത് സംസാരിക്കുകയായിരുന്നു മന്ത്രി. മലയാള സിനിമയുടെ മാത്രമല്ല തെന്നിന്ത്യൻ സിനിമയുടെ തന്നെ അഭിമാന താരങ്ങളാണ് വേദിയിലുള്ളതെന്ന് മന്ത്രി പറഞ്ഞു.
ചലച്ചിത്ര മേളയിലെ ഈ നിമിഷം മറക്കാതിരിക്കാനാണ് 'മറക്കില്ലൊരിക്കലും' എന്ന പേര് ഇട്ടതെന്നും വരും വർഷങ്ങളിലും ചലച്ചിത്ര സാങ്കേതിക മേഖലയിലുള്ളവരെ ഉൾപ്പെടെ ആദരിക്കുന്ന ചടങ്ങ് സംഘടിപ്പിക്കുമെന്നും സാങ്കേതിക മേഖലയിൽ സ്ത്രീ സാന്നിധ്യം വർധിപ്പിക്കുന്ന പരിപാടികൾ സംസ്ഥാന സർക്കാർ നടപ്പാക്കി വരുന്നുണ്ടെന്നും അദ്ദേഹം പറഞ്ഞു.