ബിഗ് ബോസിൽ കഴിഞ്ഞ ദിവസം ഒനീലിനെതിരെ ഗുരുതര ആരോപണം മസ്താനിയും ലക്ഷ്മിയും നടത്തിയിരുന്നു. ഒനീൽ തന്നെ മോശമായി സ്പർശിച്ചുവെന്നാണ് മസ്താനി ആരോപിച്ചത്. ഇതേ കാര്യത്തെച്ചൊല്ലി ലക്ഷ്മിയും ഒനീലുമായി തർക്കിച്ചിരുന്നു. അറിഞ്ഞുകൊണ്ടത് താൻ ചെയ്തില്ലെന്ന് പല ആവർത്തി ഒനീൽ പറഞ്ഞെങ്കിലും അത് അംഗീകരിക്കാൻ മസ്താനിയും ലക്ഷ്മിയോ തയ്യാറായിരുന്നില്ല. ഇതിനു പിന്നാലെ കഴിഞ്ഞ ദിവസം കണ്‍ഫെഷന്‍ റൂമിൽ പോയി ഒനീൽ പൊട്ടിക്കരഞ്ഞതും ഏറെ ചർച്ചയായിരുന്നു.
ഇക്കാര്യം ചോദ്യം ചെയ്യുന്ന മോഹൻലാലിന്റെ വീഡിയോ ആണ് ഇപ്പോൾ സോഷ്യൽ മീഡിയയിൽ വൈറലാകുന്നത്. 'ഒനീലിനെ പറ്റി പ്രേക്ഷകർക്കോ വീട്ടുകാർക്കോ ഞങ്ങൾക്കോ ഒരു തെറ്റിദ്ധാരണയുമില്ല’ എന്നാണ് മോഹൻലാൽ പുതിയ പ്രമോയിൽ പറയുന്നത്. മസ്താനിയേയും ലക്ഷ്മിയേയും മോഹൻലാൽ ചോദ്യം ചെയ്യുന്നുമുണ്ട്. 'ഭയങ്കരമായി അയാൾ ഉപദ്രവിച്ചോ?' എന്നാണ് മസ്താനിയോട് മോഹൻലാൽ ചോദിക്കുന്നത്. മസ്താനിക്ക് പോലും അത്ര ഉറപ്പില്ലാത്ത കാര്യത്തിന് ഇത്ര ട്രിഗറാകാൻ കാരണമെന്താണ്’ എന്നാണ് ലക്ഷ്മിയോടും മോഹൻലാൽ ചോദിക്കുന്നത്.
ബിഗ് ബോസ് വീട്ടിൽ ഏറ്റവും മോശമായ പദപ്രയോഗങ്ങൾ നടത്തുന്നത് ലക്ഷ്മിയാണ്. 'കുടുംബത്തിൽ കയറ്റാൻ കൊള്ളാത്തവർ, നല്ല കുടുംബത്തിൽ ജനിക്കാത്തവർ’, എന്ന് മോഹൻലാൽ പറയുന്നത് പ്രമോയിൽ കാണാം. സംഭവത്തിൽ ഒനീലിന്റെ പ്രതികരണവും മോഹൻലാൽ തേടി. ലക്ഷ്മി പുരുഷന്മാരോടെല്ലാം മാപ്പ് പറയണമെന്നായിരുന്നു ഒനീൽ പറഞ്ഞത്.