കൊച്ചി: കുന്നത്തുനാട് മണ്ഡലത്തിലെ എട്ട് പഞ്ചായത്തുകളിലും എൽഡിഎഫിനെ ഭരണത്തിൽ നിന്ന് പുറത്താക്കി ട്വന്റി 20 - യുഡിഎഫ് സഖ്യം. വടവുകോട് - പുത്തൻകുരിശ് പഞ്ചായത്തിൽ ഉൾപ്പെടെ ട്വന്റി 20 പിന്തുണയോടെ യുഡിഎഫ് അധികാരം പിടിച്ചതോടെ മണ്ഡലത്തിൽ എൽഡിഎഫ് പൂർണ്ണമായും ഭരണത്തിന് പുറത്തായി.
പ്രധാന പഞ്ചായത്തുകളിലെ കക്ഷിനിലയും ഭരണവും
വടവുകോട് - പുത്തൻകുരിശ്: ഏറ്റവും വലിയ ഒറ്റകക്ഷിയായിട്ടും (8 സീറ്റ്) എൽഡിഎഫിന് ഭരണം നഷ്ടമായി. 7 സീറ്റുള്ള യുഡിഎഫിനെ ട്വന്റി 20 (2 സീറ്റ്) പിന്തുണച്ചതോടെ യുഡിഎഫിന്റെ റെജി തോമസ് പ്രസിഡന്റായി.
കിഴക്കമ്പലം: 14 സീറ്റുകൾ നേടി ട്വന്റി 20 ഭരണം നിലനിർത്തി. ഇവിടെ രൂപീകരിച്ച സംയുക്ത മുന്നണിക്ക് 7 സീറ്റുകൾ ലഭിച്ചു.
ഐക്കരനാട്: മുഴുവൻ വാർഡുകളിലും (16) വിജയിച്ച് ട്വന്റി 20 ചരിത്രവിജയം ആവർത്തിച്ചു.
പൂതൃക്ക: യുഡിഎഫും ട്വന്റി 20യും 7 വീതം സീറ്റുകൾ നേടി തുല്യത പാലിച്ചെങ്കിലും നറുക്കെടുപ്പിലൂടെ ട്വന്റി 20 അധികാരം നേടി. പൂജ ജോമോൻ പ്രസിഡന്റായി തിരഞ്ഞെടുക്കപ്പെട്ടു.
തിരുവാണിയൂർ: 9 സീറ്റുകളുമായി ട്വന്റി 20 ഏറ്റവും വലിയ ഒറ്റകക്ഷിയായി അധികാരം പിടിച്ചു.
വാഴക്കുളം & കുന്നത്തുനാട്: യുഡിഎഫ് വ്യക്തമായ ഭൂരിപക്ഷത്തോടെ ഭരണം പിടിച്ചു. വാഴക്കുളത്ത് 24-ൽ 15 വാർഡുകളിലും കുന്നത്തുനാട് പഞ്ചായത്തിൽ 12 സീറ്റുകളിലും യുഡിഎഫ് വിജയിച്ചു.
മഴുവന്നൂർ: ഇവിടെയും യുഡിഎഫ് ഭരണസാരഥ്യം നിലനിർത്തി.
വടവുകോട് ബ്ലോക്ക് പഞ്ചായത്ത് പ്രസിഡന്റ് സ്ഥാനം നറുക്കെടുപ്പിലൂടെ എൽഡിഎഫ് നേടി എന്നത് മാത്രമാണ് ഇടത് മുന്നണിക്ക് ആശ്വാസമായത്. കോൺഗ്രസിലെ സവിത അബ്ദുൾറഹ്മാനെയാണ് നറുക്കെടുപ്പിലൂടെ പരാജയപ്പെടുത്തിയത്. എന്നാൽ വൈസ് പ്രസിഡന്റ് സ്ഥാനം യുഡിഎഫിന് ലഭിച്ചു.
ട്വന്റി 20യും കോൺഗ്രസും നേരിട്ടല്ലാതെ കൈകോർത്തത് കുന്നത്തുനാട് മണ്ഡലത്തിലെ രാഷ്ട്രീയ സമവാക്യങ്ങളിൽ വലിയ മാറ്റങ്ങൾക്കാണ് വഴിതുറന്നിരിക്കുന്നത്.