തിരുവനന്തപുരം: ജനുവരി 16-ന് സംസ്ഥാനത്തെ 70 കെ.എസ്.ഇ.ബി സെക്ഷൻ ഓഫീസുകളിൽ വിജിലൻസ് നടത്തിയ പരിശോധനയെത്തുടർന്നുണ്ടായ വാർത്തകൾക്കെതിരെ കെ.എസ്.ഇ.ബി വർക്കേഴ്സ് അസോസിയേഷൻ പ്രതിഷേധം രേഖപ്പെടുത്തി. 'ഓപ്പറേഷൻ ഷോർട്ട് സർക്യൂട്ട്' എന്ന പേരിൽ നടന്ന പരിശോധനയിൽ വ്യാപക അഴിമതി കണ്ടെത്തിയെന്ന പ്രചാരണം തെറ്റാണെന്ന് അസോസിയേഷൻ പ്രസ്താവനയിൽ പറഞ്ഞു.
രാപ്പകൽ ഭേദമന്യേയും പ്രതികൂല കാലാവസ്ഥയിലും ജനങ്ങൾക്ക് വൈദ്യുതി എത്തിക്കാൻ ആത്മാർത്ഥമായി ജോലി ചെയ്യുന്നവരാണ് കെ.എസ്.ഇ.ബി ജീവനക്കാർ. ഏതാനും പരിശോധനകളുടെ പേരിൽ സമസ്ത ജീവനക്കാരെയും അഴിമതിക്കാരായി ചിത്രീകരിക്കുന്നത് പൊതുസമൂഹത്തിന് മുന്നിൽ അവരെ അപമാനിക്കുന്നതിന് തുല്യമാണ്.
മാധ്യമങ്ങളിൽ വന്ന വാർത്തകൾ വസ്തുതാവിരുദ്ധമാണ്. ഉത്തരവാദിത്തമുള്ള പൊതുമേഖലാ സ്ഥാപനത്തിലെ ജീവനക്കാരെ സംശയത്തിന്റെ നിഴലിലാക്കുന്നത് സേവനങ്ങളെ ബാധിക്കുമെന്നും അസോസിയേഷൻ ചൂണ്ടിക്കാട്ടി. വിജിലൻസ് പരിശോധനകളുടെ ഫലത്തെക്കുറിച്ച് കൃത്യമായ ധാരണയില്ലാതെ മാധ്യമങ്ങൾ ഏകപക്ഷീയമായ വാർത്തകൾ നൽകുന്നതിനെതിരെ ശക്തമായ പ്രതിഷേധം തുടരുമെന്നും അസോസിയേഷൻ വ്യക്തമാക്കി.