തിരുവനന്തപുരം: സംസ്ഥാനത്ത് നിലവിലുള്ള കടുത്ത വൈദ്യുതി പ്രതിസന്ധിയെ തുടർന്ന് ഇന്നും വിവിധ പ്രദേശങ്ങളിൽ ഭാഗികമായി വൈദ്യുതി നിയന്ത്രണം ഏർപ്പെടുത്തുമെന്ന് കേരള സ്റ്റേറ്റ് ഇലക്ട്രിസിറ്റി ബോർഡ് (KSEB) അറിയിച്ചു (Kerala power restriction tonight). പീക്ക് അവറുകളിൽ സംസ്ഥാനത്ത് ആവശ്യമായി വരുന്ന വൈദ്യുതിയുടെ അളവിൽ 400 മുതൽ 500 മെഗാവാട്ട് വരെയുള്ള വലിയ കുറവാണ് നിലവിൽ രേഖപ്പെടുത്തുന്നത്. ഇതിന്റെ പശ്ചാത്തലത്തിലാണ് നിയന്ത്രണം ഏർപ്പെടുത്താൻ ബോർഡ് നിർബന്ധിതരായിരിക്കുന്നത്.
സംസ്ഥാനത്ത് കാലവർഷത്തിൽ ഉണ്ടായ കടുത്ത മഴക്കുറവും അന്തരീക്ഷ താപനില താരതമ്യേന ഉയർന്ന നിലയിൽ തുടരുന്നതുമാണ് പെട്ടെന്നുള്ള ഈ പ്രതിസന്ധിക്ക് ആക്കം കൂട്ടിയത്. ചൂട് കൂടിയതോടെ വീടുകളിലും സ്ഥാപനങ്ങളിലും എയർ കണ്ടീഷണർ ഉൾപ്പെടെയുള്ള ഉപകരണങ്ങളുടെ ഉപയോഗം വൻതോതിൽ വർദ്ധിക്കുകയും, ഇത് വൈകുന്നേരങ്ങളിലെ വൈദ്യുതി ആവശ്യകത റെക്കോർഡ് നിലയിലേക്ക് ഉയർത്തുകയും ചെയ്തു. കേന്ദ്ര പൂളിൽ നിന്നും പവർ എക്സ്ചേഞ്ചുകളിൽ നിന്നുമുള്ള ലഭ്യതക്കുറവും ഇതിനൊപ്പം പ്രതിസന്ധി ഇരട്ടിയാക്കി.
വൈകുന്നേരം 7 മണിക്ക് ശേഷമുള്ള പീക്ക് സമയങ്ങളിൽ ഉപഭോക്താക്കളെ വലിയ രീതിയിൽ ബാധിക്കാത്ത തരത്തിൽ ഘട്ടംഘട്ടമായിട്ടായിരിക്കും നിയന്ത്രണം ഏർപ്പെടുത്തുക. പ്രതിസന്ധി മറികടക്കാൻ വൈകുന്നേരങ്ങളിൽ അനാവശ്യമായ ലൈറ്റുകളും മറ്റ് ഉയർന്ന തോതിൽ വൈദ്യുതി ഉപയോഗിക്കുന്ന ഉപകരണങ്ങളും പ്രവർത്തിപ്പിക്കാതെ ജനങ്ങൾ പരമാവധി സഹകരിക്കണമെന്നും കെ.എസ്.ഇ.ബി അഭ്യർത്ഥിച്ചു.
Story Summary: KSEB announced that partial power restrictions will continue in Kerala today due to a severe shortage of 400-500 MW in the electricity grid. The crisis is triggered by a significant drop in rainfall and sustained high temperatures, which have led to a sharp increase in peak-hour electricity demand across the state.
