കൊച്ചി: തദ്ദേശ തിരഞ്ഞെടുപ്പിൽ യുഡിഎഫ് സ്ഥാനാർത്ഥികളായി മത്സരിച്ച പതിനയ്യായിരത്തോളം പ്രതിനിധികളെ അണിനിരത്തി കെപിസിസി സംഘടിപ്പിക്കുന്ന 'വിജയോത്സവം 2026 മഹാപഞ്ചായത്ത്' ഇന്ന് കൊച്ചി മറൈൻ ഡ്രൈവിൽ നടക്കും. ലോക്സഭാ പ്രതിപക്ഷ നേതാവ് രാഹുൽ ഗാന്ധി സമ്മേളനം ഉദ്ഘാടനം ചെയ്യും. നിയമസഭാ തിരഞ്ഞെടുപ്പ് മുന്നിൽക്കണ്ട് പാർട്ടിയെ സജ്ജമാക്കുക എന്ന ലക്ഷ്യത്തോടെയാണ് ഈ സംഗമം സംഘടിപ്പിച്ചിരിക്കുന്നത്.(KPCC's programme to be inaugurated in Kochi by Rahul Gandhi today)
തിരഞ്ഞെടുപ്പിൽ വിജയിച്ചവർക്കൊപ്പം തന്നെ പരാജയപ്പെട്ട സ്ഥാനാർത്ഥികളെയും ചേർത്തുനിർത്തുക എന്നതാണ് ഈ പരിപാടിയുടെ പ്രധാന ലക്ഷ്യം. വരാനിരിക്കുന്ന നിയമസഭാ തിരഞ്ഞെടുപ്പിൽ താഴെത്തട്ടിലുള്ള എല്ലാ നേതാക്കൾക്കും തുല്യ ഉത്തരവാദിത്തം നൽകി പാർട്ടിയെ ചലിപ്പിക്കാൻ കെപിസിസി ലക്ഷ്യമിടുന്നു.
ഉച്ചയ്ക്ക് 12.45-ന് ചാർട്ടേഡ് വിമാനത്തിൽ രാഹുൽ ഗാന്ധി കൊച്ചിയിലെത്തും. തൃക്കാക്കരയിലെ വസതിയിലെത്തി പ്രമുഖ സാഹിത്യകാരി ഡോ. എം. ലീലാവതിക്ക് പ്രിയദർശിനി പബ്ലിക്കേഷൻസിന്റെ സാഹിത്യ പുരസ്കാരം അദ്ദേഹം സമ്മാനിക്കും. ഉച്ചയ്ക്ക് 2 മണിക്ക് മറൈൻ ഡ്രൈവിൽ നടക്കുന്ന വിജയോത്സവം ഉദ്ഘാടനം ചെയ്യും.
വൈകിട്ട് 4 മണിയോടെ അദ്ദേഹം ഡൽഹിയിലേക്ക് തിരിക്കും.കെപിസിസി അധ്യക്ഷൻ, പ്രതിപക്ഷ നേതാവ് വി.ഡി. സതീശൻ എന്നിവരടക്കമുള്ള സംസ്ഥാനത്തെ പ്രമുഖ നേതാക്കൾ സമ്മേളനത്തിൽ പങ്കെടുക്കും.