കോട്ടയം: മാണിക്കുന്നത്ത് യുവാവിനെ കുത്തിക്കൊലപ്പെടുത്തിയ സംഭവത്തിൻ്റെ ഞെട്ടിക്കുന്ന സി.സി.ടി.വി. ദൃശ്യങ്ങൾ പുറത്തുവന്നു. പ്രതിയായ അഭിജിത്തിൻ്റെ വീട്ടിൽ തന്നെയുള്ള ദൃശ്യങ്ങളാണ് കൊലപാതകത്തിൻ്റെ ഭീകരത വെളിപ്പെടുത്തുന്നത്. അഭിജിത്തും കൊല്ലപ്പെട്ട ആദർശും തമ്മിലുള്ള സാമ്പത്തിക തർക്കമാണ് അരുംകൊലയിലേക്ക് നയിച്ചത്.(Kottayam murder, Shocking CCTV footage of a young man being stabbed to death is released)
നിലവിൽ അഭിജിത്തും അച്ഛനും അമ്മയും പോലീസ് കസ്റ്റഡിയിലാണുള്ളത്. അഭിജിത്തും ആദർശും തമ്മിൽ പല തരത്തിലുള്ള സാമ്പത്തിക ഇടപാടുകളും നിലനിന്നിരുന്നു. ഏറ്റവുമൊടുവിൽ, അഭിജിത്തിൻ്റെ വിദേശത്തുള്ള സുഹൃത്തിൻ്റെ ബൈക്ക് 12,000 രൂപയ്ക്ക് ഇവർ ആദർശിന് പണയം വെച്ചിരുന്നു.
പണം അടച്ചതിനെ തുടർന്ന് ബൈക്ക് തിരികെ നൽകാൻ സുഹൃത്ത് ആവശ്യപ്പെട്ടപ്പോൾ, അഭിജിത്ത് ആദർശിനെ സമീപിച്ചു. എന്നാൽ, പണം ലഭിച്ചിട്ടില്ലെന്ന് പറഞ്ഞ് ആദർശ് ബൈക്ക് തിരികെ നൽകാൻ തയ്യാറായില്ല. ഇതിനെ ചൊല്ലിയുള്ള വാക്കുതർക്കവും സംഘർഷവുമാണ് ഇന്ന് പുലർച്ചെ അഭിജിത്തിൻ്റെ വീട്ടിലെ ആക്രമണത്തിലേക്ക് എത്തിയത്.
പുറത്തുവന്ന സി.സി.ടി.വി. ദൃശ്യങ്ങൾ പ്രകാരം, തർക്കത്തിനിടെ അഭിജിത്ത് വീട്ടിനകത്ത് നിന്ന് കത്തിയെടുത്തു കൊണ്ടുവന്ന് ആദർശിനെ കുത്തുകയായിരുന്നു. അഭിജിത്തിൻ്റെ അമ്മയും അച്ഛനും ചേർന്ന് ഇവരെ പിടിച്ചു മാറ്റാൻ ശ്രമിക്കുന്നതും ദൃശ്യങ്ങളിൽ കാണാം.
സംഭവം കണ്ട പ്രദേശവാസികളാണ് പോലീസിനെ വിവരമറിയിച്ചത്. കൊലയ്ക്കുപയോഗിച്ച കത്തി പോലീസ് സ്ഥലത്ത് നിന്ന് കണ്ടെടുത്തിട്ടുണ്ട്. ആദർശിനൊപ്പം എത്തിയ സുഹൃത്തിന് വേണ്ടിയും പോലീസ് തെരച്ചിൽ നടത്തുകയാണ്.