കിളിമാനൂർ: സംസ്ഥാന പാതയിലെ പാപ്പാലയിൽ ദമ്പതികളുടെ മരണത്തിനിടയാക്കിയ വാഹനാപകടക്കേസ് കൈകാര്യം ചെയ്യുന്നതിൽ വീഴ്ച വരുത്തിയ മൂന്ന് പോലീസ് ഉദ്യോഗസ്ഥരെ ദക്ഷിണമേഖല ഐജി സസ്പെൻഡ് ചെയ്തു. കിളിമാനൂർ എസ്.എച്ച്.ഒ ബി. ജയൻ, എസ്.ഐ അരുൺ, ഗ്രേഡ് എസ്.ഐ ഷജീം എന്നിവരെയാണ് സസ്പെൻഡ് ചെയ്തത്. ഇവർക്കെതിരെ വകുപ്പുതല അന്വേഷണത്തിനും ഉത്തരവിട്ടു.
എഫ്.ഐ.ആർ രജിസ്റ്റർ ചെയ്യുന്നതിലും സാക്ഷിമൊഴികൾ രേഖപ്പെടുത്തുന്നതിലും കടുത്ത വീഴ്ച സംഭവിച്ചു. അപകടത്തിന് ശേഷം നാട്ടുകാർ പിടികൂടി ഏൽപ്പിച്ച മുഖ്യപ്രതി വിഷ്ണുവിനെ, മദ്യലഹരിയിലാണെന്ന കാരണം പറഞ്ഞ് പോലീസ് ജാമ്യത്തിൽ വിട്ടയച്ചു. ഇയാൾ പിന്നീട് ഒളിവിൽ പോകാൻ ഇത് കാരണമായി. പോലീസ് സ്റ്റേഷന് സമീപം കസ്റ്റഡിയിലുണ്ടായിരുന്ന പ്രതിയുടെ ജീപ്പ് ഭാഗികമായി കത്തിയത് തെളിവ് നശിപ്പിക്കാനുള്ള നീക്കമാണെന്ന് നാട്ടുകാർ ആരോപിക്കുന്നു.
കഴിഞ്ഞ ജനുവരി 4-ന് വൈകിട്ട് പാപ്പാലയിൽ വെച്ചാണ് രഞ്ജിത്തും ഭാര്യ അംബികയും സഞ്ചരിച്ചിരുന്ന ബൈക്കിൽ അമിതവേഗതയിലെത്തിയ ജീപ്പിടിക്കുന്നത്. ഗുരുതരമായി പരിക്കേറ്റ അംബിക ഏഴാം തീയതിയും രഞ്ജിത് കഴിഞ്ഞ ദിവസവുമാണ് മരണപ്പെട്ടത്. പ്രതികൾ മദ്യപിച്ച് വാഹനം ഓടിച്ചതായും അപകടത്തിന് ശേഷം ബൈക്ക് മാറ്റാൻ വൈദ്യുത തൂണിൽ ഇടിപ്പിച്ചതായും സാക്ഷികൾ പറയുന്നു.
പ്രതിയെ പിടികൂടാത്തതിൽ പ്രകോപിതരായ നാട്ടുകാർ രഞ്ജിത്തിന്റെ മൃതദേഹവുമായി പോലീസ് സ്റ്റേഷൻ ഉപരോധിച്ചിരുന്നു. പ്രതിഷേധിച്ച ജനപ്രതിനിധികളടക്കം 58 പേർക്കെതിരെ പോലീസ് കേസെടുത്തത് വൻ വിവാദമായിരുന്നു. നിലവിൽ പ്രതി വിഷ്ണുവിനെ ഒളിവിൽ പോകാൻ സഹായിച്ച ആദർശ് എന്ന സുഹൃത്തിനെ പോലീസ് കസ്റ്റഡിയിലെടുത്തിട്ടുണ്ട്. വിഷ്ണുവിനായുള്ള തിരച്ചിൽ തുടരുകയാണ്.
മരിച്ച രഞ്ജിത്-അംബിക ദമ്പതികൾക്ക് രണ്ട് മക്കളാണുള്ളത്. മാതാപിതാക്കളെ നഷ്ടപ്പെട്ട കുട്ടികളുടെ സംരക്ഷണം സംബന്ധിച്ചും നാട്ടുകാർക്കിടയിൽ വലിയ ആശങ്ക നിലനിൽക്കുന്നു.