തിരുവനന്തപുരം: ശമ്പള പരിഷ്‌കരണം ഉൾപ്പെടെ വിവിധ ആവശ്യങ്ങൾ ഉന്നയിച്ച് സർക്കാർ മെഡിക്കൽ കോളജ് ഡോക്ടർമാർ നടത്തുന്ന സമരത്തിൽ സംഘടനകൾ തമ്മിൽ ഭിന്നത. ഡോക്ടർമാരുടെ മറ്റൊരു സംഘടനയായ കേരള ഗവൺമെന്റ് പോസ്റ്റ് ഗ്രാജുവേറ്റ് മെഡിക്കൽ ടീച്ചേഴ്സ് അസോസിയേഷൻ (കെ.ജി.പി.എം.ടി.എ.) സമരത്തിൽ നിന്ന് വിട്ടുനിന്നു.(KGPMTA didn't participate in Medical college doctors' strike)
സമരത്തിൽ നിന്ന് വിട്ടുനിന്നതിൻ്റെ കാരണം വ്യക്തമാക്കിക്കൊണ്ട് കെ.ജി.പി.എം.ടി.എ. സംസ്ഥാന പ്രസിഡൻ്റ് ഡോ. അജിത് പ്രസാദ് പ്രതികരിച്ചു. "ഹാജർ രേഖപ്പെടുത്തിയതിനുശേഷം ജോലിയിൽ നിന്നും മാറിനിൽക്കുന്നത് സമരവുമല്ല, നൈതികതയും അല്ല."
ശമ്പള പരിഷ്‌കരണം അടക്കം പല കാര്യങ്ങളും കോടതിയുടെ പരിഗണനയിലുള്ള വിഷയമാണ്. തദ്ദേശ തിരഞ്ഞെടുപ്പ് പ്രഖ്യാപിച്ചതിനാൽ സർക്കാരിന് നിലവിൽ നയപരമായ തീരുമാനങ്ങൾ എടുക്കാൻ സാധിക്കില്ല.
കേരള ഗവൺമെന്റ് മെഡിക്കൽ കോളജ് ടീച്ചേഴ്സ് അസോസിയേഷനാണ് (കെ.ജി.എം.സി.ടി.എ.) ഒ.പി. ബഹിഷ്‌കരിച്ച് സമരം നടത്തുന്നത്. ഇവരുടെ പ്രധാന ആവശ്യങ്ങൾ ശമ്പള പരിഷ്‌കരണ കുടിശിക വിതരണം ചെയ്യുക, സംസ്ഥാനത്ത് പുതിയ മെഡിക്കൽ കോളജ് ആരംഭിക്കുന്നതിന് മുൻപ് ആവശ്യമായ തസ്തികകൾ സൃഷ്ടിക്കുക, ഡോക്ടർമാരുടെ അശാസ്ത്രീയമായ പുനർവിന്യാസം അവസാനിപ്പിക്കുക എന്നിവയാണ്.
ആരോഗ്യ മന്ത്രിയിൽ നിന്ന് ഉറപ്പ് ലഭിക്കാതെ സമരം അവസാനിപ്പിക്കില്ലെന്നാണ് കെ.ജി.എം.സി.ടി.എ.യുടെ നിലപാട്. സമരത്തെക്കുറിച്ച് അറിയാതെ മെഡിക്കൽ കോളജുകളിലെത്തിയ രോഗികൾ ഒ.പി. ബഹിഷ്‌കരണത്തെ തുടർന്ന് കടുത്ത ദുരിതത്തിലായി.