തിരുവനന്തപുരം: രാജ്യത്തെ കയറ്റുമതി മേഖലയിൽ കരുത്തുറ്റ മുന്നേറ്റവുമായി കേരളം. നിതി ആയോഗ് പുറത്തിറക്കിയ ഏറ്റവും പുതിയ കയറ്റുമതി സന്നദ്ധതാ സൂചികയിൽ (Export Preparedness Index) കേരളം പതിനൊന്നാം സ്ഥാനത്തെത്തി. മുൻ വർഷങ്ങളെ അപേക്ഷിച്ച് മികച്ച പ്രകടനമാണ് സംസ്ഥാനം ഇത്തവണ കാഴ്ചവെച്ചത്.
സംസ്ഥാന സർക്കാർ നടപ്പിലാക്കിയ വ്യവസായ സൗഹൃദ നയങ്ങളും അടിസ്ഥാന സൗകര്യ വികസനവുമാണ് ഈ നേട്ടത്തിന് പിന്നിലെ പ്രധാന ഘടകങ്ങളെന്ന് നിതി ആയോഗ് റിപ്പോർട്ട് ചൂണ്ടിക്കാട്ടുന്നു. കയറ്റുമതി നയങ്ങളുടെ കാര്യത്തിൽ കേരളം ദേശീയ ശരാശരിയേക്കാൾ മുന്നിലാണ്.
വ്യവസായങ്ങൾ തുടങ്ങുന്നതിനുള്ള നടപടിക്രമങ്ങൾ ലളിതമാക്കിയതും ഏകജാലക സംവിധാനത്തിന്റെ (Single Window System) ഫലപ്രദമായ വിനിയോഗവും സൂചികയിൽ കേരളത്തിന് ഗുണകരമായി. നിക്ഷേപകരെ ആകർഷിക്കുന്നതിനും പ്രാദേശിക ഉൽപ്പന്നങ്ങൾക്ക് ആഗോള വിപണി കണ്ടെത്താനുമായി സർക്കാർ നടത്തിയ ഇടപെടലുകൾ ഫലം കാണുന്നുവെന്നും റിപ്പോർട്ട് വ്യക്തമാക്കുന്നു.
കയറ്റുമതിയിലെ കരുത്ത് സമുദ്രോത്പന്നങ്ങൾ, സുഗന്ധവ്യഞ്ജനങ്ങൾ, റബ്ബർ, ഇലക്ട്രോണിക്സ് ഉപകരണങ്ങൾ എന്നിവയുടെ കയറ്റുമതിയിൽ കേരളം വലിയ വിഹിതം കൈയ്യാളുന്നുണ്ട്. വരും വർഷങ്ങളിൽ ആദ്യ പത്ത് സ്ഥാനങ്ങളിൽ ഇടംപിടിക്കാനാണ് സംസ്ഥാനം ലക്ഷ്യമിടുന്നതെന്ന് വ്യവസായ മന്ത്രി പി. രാജീവ് ഫേസ്ബുക്ക് പോസ്റ്റിലൂടെ അറിയിച്ചു.