തിരുവനന്തപുരം: 2024-ലെ കേരള സംസ്ഥാന ചലച്ചിത്ര പുരസ്കാരങ്ങൾ വിതരണം ചെയ്യുന്ന പ്രൗഢഗംഭീരമായ ചടങ്ങ് ജനുവരി 25 ഞായറാഴ്ച വൈകിട്ട് തിരുവനന്തപുരത്ത് നടക്കും (Kerala State Film Awards 2024). തിരുവനന്തപുരം നിശാഗന്ധി ഓഡിറ്റോറിയത്തിൽ വൈകിട്ട് 6:30-ന് നടക്കുന്ന ചടങ്ങിൽ മുഖ്യമന്ത്രി പിണറായി വിജയൻ ജേതാക്കൾക്ക് അവാർഡുകൾ സമ്മാനിക്കും. ചലച്ചിത്ര രംഗത്തെ സമഗ്ര സംഭാവനയ്ക്കുള്ള കേരള സർക്കാരിന്റെ പരമോന്നത ബഹുമതിയായ ജെ.സി ഡാനിയേൽ പുരസ്കാരം പ്രശസ്ത നടി ശാരദ മുഖ്യമന്ത്രിയിൽ നിന്നും ഏറ്റുവാങ്ങും എന്നതാണ് ഇത്തവണത്തെ ചടങ്ങിന്റെ പ്രധാന ആകർഷണം. സാംസ്കാരിക വകുപ്പ് മന്ത്രി സജി ചെറിയാൻ ചടങ്ങിൽ അധ്യക്ഷത വഹിക്കും.
മലയാള സിനിമയിലെ പ്രമുഖ താരങ്ങളും സാങ്കേതിക പ്രവർത്തകരും ഉൾപ്പെടെ 51 പേർക്കാണ് ചടങ്ങിൽ അവാർഡുകൾ നൽകുന്നത്. മികച്ച നടന്മാരായ മമ്മൂട്ടി, ടൊവിനോ തോമസ്, ആസിഫ് അലി എന്നിവരും നടിമാരായ ലിജോമോൾ ജോസ്, ജ്യോതിർമയി തുടങ്ങിയവരും അവാർഡ് സ്വീകരിക്കാൻ എത്തും. ഇവർക്ക് പുറമെ സൗബിൻ ഷാഹിർ, സിദ്ധാർഥ് ഭരതൻ, സംഗീത സംവിധായകൻ സുഷിൻ ശ്യാം, സംവിധായകൻ ചിദംബരം, ഗായിക സയനോര ഫിലിപ്പ് തുടങ്ങി കലാരംഗത്തെ നിരവധി പ്രതിഭകൾ ചടങ്ങിൽ സാക്ഷിയാകും. മന്ത്രിമാരായ വി. ശിവൻകുട്ടി, ജി.ആർ. അനിൽ, മേയർ വി.വി. രാജേഷ് തുടങ്ങി രാഷ്ട്രീയ-സാംസ്കാരിക രംഗത്തെ പ്രമുഖരും ചടങ്ങിൽ പങ്കെടുക്കും.
ചലച്ചിത്ര അക്കാദമി ചെയർപേഴ്സൺ റസൂൽ പൂക്കുട്ടി, ജൂറി ചെയർമാൻ പ്രകാശ് രാജ് എന്നിവരുടെ സാന്നിധ്യത്തിലായിരിക്കും അവാർഡ് ദാനം നടക്കുക. ഔദ്യോഗിക ചടങ്ങുകൾക്ക് ശേഷം കാണികൾക്കായി പ്രത്യേക സംഗീത വിരുന്നും ഒരുക്കിയിട്ടുണ്ട്. മികച്ച പിന്നണി ഗായകർക്കുള്ള അവാർഡ് ജേതാക്കളായ കെ.എസ്. ഹരിശങ്കർ, സെബ ടോമി എന്നിവർ നയിക്കുന്ന സംഗീത പരിപാടിയാണ് നിശാഗന്ധിയിൽ അരങ്ങേറുന്നത്. സംസ്ഥാനത്തിന്റെ ചലച്ചിത്ര മേഖലയിലെ ഏറ്റവും വലിയ ഈ ഉത്സവത്തിനായി തലസ്ഥാന നഗരി ഒരുങ്ങിക്കഴിഞ്ഞു.
The Kerala State Film Awards for 2024 will be presented by Chief Minister Pinarayi Vijayan on January 25, 2026, at the Nishagandhi Auditorium in Thiruvananthapuram. Veteran actress Sharada will receive the prestigious J.C. Daniel Award, while 51 other winners including Mammootty, Tovino Thomas, and Jyothirmayi will be honored. The ceremony, attended by high-profile ministers and jury members like Prakash Raj, will be followed by a musical performance by award-winning singers K.S. Harisankar and Seba Tomy.