തിരുവനന്തപുരം: മഴക്കാലത്ത് റോഡുകളിൽ വാഹനാപകടങ്ങൾ വർധിക്കാനുള്ള സാധ്യത കണക്കിലെടുത്ത് സുരക്ഷാ നിർദ്ദേശങ്ങളുമായി കേരള പോലീസ്. വാഹനം തെന്നിമാറാനും കൂട്ടിയിടിക്കാനുമുള്ള സാധ്യത കൂടുതലായതിനാൽ, ശ്രദ്ധയോടെയുള്ള ഡ്രൈവിംഗ് ശീലങ്ങൾ പാലിക്കണമെന്ന് പോലീസ് ഫേസ്ബുക്ക് പോസ്റ്റിലൂടെ പങ്കുവെച്ചു.(Kerala Police issues guidelines to avoid traffic accidents in rainy season)
1. വേഗം പരമാവധി കുറയ്ക്കുക
റോഡിൽ വാഹനങ്ങൾ പുറന്തള്ളുന്ന എണ്ണത്തുള്ളികൾ മഴ പെയ്യുന്നതോടെ അപകടക്കെണികളായി മാറും. മഴവെള്ളത്തിനൊപ്പം എണ്ണയും ചേരുമ്പോൾ റോഡ് വഴുക്കലുള്ളതാകും. പരമാവധി പതുക്കെ വാഹനം ഓടിക്കുകയാണ് ഉചിതം. സ്റ്റിയറിംഗ് വെട്ടിത്തിരിക്കുന്നതും പെട്ടെന്ന് ബ്രേക്ക് ചവിട്ടുന്നതും ഒഴിവാക്കുക. ആക്‌സിലറേറ്ററിൽ നിന്ന് കാലെടുത്ത് വേഗം നിയന്ത്രിക്കുന്നതാണ് സുരക്ഷിതം.
2. ഹെഡ് ലൈറ്റ് ലോ ബീമിൽ ഓണാക്കുക
ശക്തമായ മഴയത്ത് ഹെഡ്‌ലൈറ്റുകൾ ലോ ബീമിൽ കത്തിക്കുന്നത് നിർബന്ധമാണ്. റോഡ് വ്യക്തമായി കാണുന്നതിനും, മറ്റു വാഹനങ്ങളുടെ ഡ്രൈവർമാരുടെ ശ്രദ്ധയിൽ നിങ്ങളുടെ വാഹനം പെടുന്നതിനും ഹെഡ്‌ലൈറ്റ് സഹായിക്കും. വാഹനത്തിൽ ഫോഗ് ലൈറ്റ് ഉണ്ടെങ്കിൽ അത് ഉപയോഗിക്കുക.
3. ടയറുകൾ ശ്രദ്ധിക്കുക
മഴക്കാലത്തിനു മുമ്പ് ടയറിൻ്റെ നിലവാരം പരിശോധിക്കുന്നത് അത്യാവശ്യമാണ്. തേയ്മാനം കൂടിയ ടയറുകൾക്ക് ഗ്രിപ്പ് കുറവായിരിക്കും. തേഞ്ഞ ടയറുകൾ ഒഴിവാക്കുക. അലൈൻമെൻ്റും വീൽ ബാലൻസിങ്ങും കൃത്യമാക്കുകയും ടയറിലെ വായുമർദ്ദം നിശ്ചിത അളവിൽ നിലനിർത്തുകയും വേണം.
4. മുൻകരുതൽ ഉറപ്പാക്കുക
യാത്ര തുടങ്ങുന്നതിന് മുമ്പ് വാഹനത്തിൻ്റെ സുരക്ഷാ സംവിധാനങ്ങൾ ശരിയായി പ്രവർത്തിക്കുന്നുണ്ടോയെന്ന് പരിശോധിക്കണം. ഹെഡ്‌ലൈറ്റ്, ബ്രേക്ക് ലൈറ്റ്, ഇൻഡിക്കേറ്റർ, വൈപ്പർ, ഹാൻഡ് ബ്രേക്ക് തുടങ്ങിയവയുടെ പ്രവർത്തനം ഉറപ്പാക്കുക.
5. വലിയ വാഹനങ്ങളോട് അകലം പാലിക്കുക
വലിയ വാഹനങ്ങളുടെ തൊട്ടുപിന്നാലെ യാത്ര ചെയ്യുന്നത് ഒഴിവാക്കുക. കൂറ്റൻ ടയറുകൾ തെറിപ്പിക്കുന്ന ചെളിവെള്ളം കാഴ്ച തടസ്സപ്പെടുത്തും. ബ്രേക്ക് കിട്ടാതെ അപകടം ഉണ്ടാകാനുള്ള സാധ്യതയുണ്ട്. വാഹനം പൂർണ്ണ നിയന്ത്രണത്തിലാക്കാൻ മറ്റു വാഹനങ്ങളുമായി പരമാവധി അകലം പാലിക്കുക.
6. ശക്തമായ മഴക്കാലത്ത് യാത്ര ഒഴിവാക്കുക
മഴ അതിശക്തമാണെങ്കിൽ, വാഹനം റോഡരികിൽ സുരക്ഷിതമായി നിർത്തിയിട്ട് മഴയുടെ ശക്തി കുറഞ്ഞ ശേഷം യാത്ര തുടരുക.