വളർത്തുനായ്ക്കൾക്ക് മൈക്രോചിപ്പും ലൈസൻസും നിർബന്ധം: നിയമം ലംഘിച്ചാൽ കർശന നടപടി | Kerala Dog License

തിരുവനന്തപുരം: സംസ്ഥാനത്ത് വളർത്തുനായ്ക്കളെ തെരുവിൽ ഉപേക്ഷിക്കുന്നത് തടയുന്നതിനായി നിയമങ്ങൾ കർശനമാക്കുന്നു. നായ്ക്കൾക്ക് ലൈസൻസ് നിർബന്ധമാക്കാനും നിയമം ലംഘിക്കുന്നവർക്കെതിരെ കർശന നടപടി സ്വീകരിക്കാനും സംസ്ഥാന ജന്തുക്ഷേമ ബോർഡ് തീരുമാനിച്ചു. നായകളുടെ വിവരങ്ങൾ ഡിജിറ്റലായി രേഖപ്പെടുത്തുന്നതിന് മൈക്രോചിപ്പ് ഘടിപ്പിക്കുന്നതടക്കമുള്ള നിർദ്ദേശങ്ങളാണ് തദ്ദേശഭരണ വകുപ്പിന് മുന്നിലുള്ളത്.

പുതിയ നിബന്ധനകൾ ഒറ്റനോട്ടത്തിൽ:

രണ്ട് നായ്ക്കൾക്ക് മാത്രം അനുമതി: ഒരു വീട്ടിൽ ലൈസൻസോടെ പരമാവധി രണ്ട് നായ്ക്കളെ മാത്രമേ വളർത്താൻ അനുവാദമുണ്ടാകൂ. അതിൽ കൂടുതൽ നായ്ക്കളെ വളർത്തണമെങ്കിൽ ബ്രീഡേഴ്സ് ലൈസൻസ് നിർബന്ധമാണ്.

മൈക്രോചിപ്പ് നിർബന്ധം: കുത്തിവെപ്പെടുത്ത നായ്ക്കളുടെ തോൾഭാഗത്ത് പ്രത്യേക ഉപകരണം ഉപയോഗിച്ച് മൈക്രോചിപ്പ് ഘടിപ്പിക്കും. നായയുടെ പേര്, ഇനം, ഉടമസ്ഥന്റെ വിലാസം എന്നിവ ഇതുവഴി തദ്ദേശ സ്ഥാപനങ്ങളുടെ ഡാറ്റാബേസുമായി ബന്ധിപ്പിക്കും.

ഉപേക്ഷിച്ചാൽ പിടിവീഴും: നായ്ക്കളെ തെരുവിൽ ഉപേക്ഷിക്കുന്നവരെ മൈക്രോചിപ്പ് വഴി എളുപ്പത്തിൽ കണ്ടെത്താം. ഇത്തരക്കാർക്കെതിരെ നിയമനടപടി സ്വീകരിക്കും.

ഡിജിറ്റൽ ലൈസൻസ്: കെ-സ്മാർട്ട് (K-Smart) ആപ്പ് വഴി ലൈസൻസ് ലഭ്യമാക്കാനുള്ള സൗകര്യം ഒരുക്കും. നിശ്ചിത ഫീസ് ഇതിനായി ഈടാക്കുന്നതാണ്.

വാക്സിനേഷനും വന്ധ്യംകരണവും

നിയമപ്രകാരമുള്ള വാക്സിനേഷനും വന്ധ്യംകരണവും അതത് സമയങ്ങളിൽ പൂർത്തിയാക്കുന്ന നായ്ക്കൾക്ക് മാത്രമേ ലൈസൻസ് നൽകുകയുള്ളൂ. നിലവിൽ ലൈസൻസ് നിബന്ധനകൾ ഉണ്ടെങ്കിലും അത് കർശനമായി പാലിക്കപ്പെടാത്ത സാഹചര്യത്തിലാണ് പഞ്ചായത്ത്-നഗരപാലിക നിയമങ്ങൾ ഭേദഗതി ചെയ്യാൻ ബോർഡ് ശുപാർശ ചെയ്തത്.

അശാസ്ത്രീയമായ പ്രജനനവും നായ്ക്കളെ വിൽക്കാൻ കഴിയാതെ വരുമ്പോൾ തെരുവിൽ ഉപേക്ഷിക്കുന്ന രീതിയും ഇല്ലാതാക്കാൻ ബ്രീഡേഴ്സ് ലൈസൻസ് വഴി സാധിക്കുമെന്നാണ് അധികൃതരുടെ വിലയിരുത്തൽ.