കൊച്ചി: കൊവിഡ് പ്രതിരോധത്തിന്റെ ഭാഗമായി അമേരിക്കൻ കമ്പനിയായ സ്പ്രിംഗ്ലറുമായി സർക്കാർ നടത്തിയ വിവരശേഖരണ കരാറിൽ അഴിമതിയോ ദുരുദ്ദേശമോ ഇല്ലെന്ന് ഹൈക്കോടതി. അസാധാരണമായ ഒരു സാഹചര്യത്തിലാണ് ഇത്തരമൊരു കരാറിലേക്ക് നീങ്ങിയതെന്ന സർക്കാരിന്റെ വാദം കോടതി അംഗീകരിച്ചു. ചീഫ് ജസ്റ്റിസ് ഉൾപ്പെട്ട ബെഞ്ചാണ് പ്രതിപക്ഷ നേതാക്കൾ നൽകിയ ഹർജികൾ തീർപ്പാക്കിയത്.
പൗരന്മാരുടെ സ്വകാര്യ വിവരങ്ങൾ ചോർന്നുവെന്ന ആരോപണം കോടതി തള്ളി. ഇതുവരെ വിവരങ്ങൾ ചോർന്നതായി ഒരു പൗരനിൽ നിന്നും പരാതി ഉയർന്നിട്ടില്ലെന്ന് കോടതി ചൂണ്ടിക്കാട്ടി. വിവരങ്ങൾ പൂർണ്ണമായും സർക്കാരിന്റെ നിയന്ത്രണത്തിലായിരുന്നു. രോഗപ്രതിരോധത്തിനായി സ്പ്രിംഗ്ലർ കമ്പനിയെ ഒരു ഉപാധിയായി മാത്രമാണ് ഉപയോഗിച്ചത്.
കൊവിഡ് പശ്ചാത്തലത്തിൽ അടിയന്തരമായി വിവരങ്ങൾ വിശകലനം ചെയ്യേണ്ട സാഹചര്യം പരിഗണിക്കുമ്പോൾ സർക്കാരിന്റെ നടപടിയിൽ ദുരൂഹത കാണാനാവില്ല. മുൻ പ്രതിപക്ഷ നേതാവ് രമേശ് ചെന്നിത്തല ഉൾപ്പെടെയുള്ള നേതാക്കളാണ് സ്പ്രിംഗ്ലർ ഇടപാടിൽ 700 കോടി രൂപയുടെ അഴിമതി ആരോപിച്ചത്. ഡാറ്റാ മോഷണത്തിന് നടപടി നേരിട്ട കമ്പനിക്ക് രോഗികളുടെ വിവരങ്ങൾ കൈമാറിയത് ഗൂഢാലോചനയുടെ ഭാഗമാണെന്നായിരുന്നു പ്രതിപക്ഷത്തിന്റെ വാദം. എന്നാൽ ഈ വാദങ്ങളെല്ലാം കോടതി തള്ളി.