തിരുവനന്തപുരം: പൗരത്വഭേദഗതി നിയമം (CAA), പൗരത്വ പട്ടിക (NRC) എന്നിവയുമായി ബന്ധപ്പെട്ട് ജനങ്ങൾക്കിടയിലുള്ള ആശങ്കകൾ അകറ്റുന്നതിനായി ആധികാരികമായ തിരിച്ചറിയൽ രേഖയായി 'നേറ്റിവിറ്റി കാർഡ്' പുറത്തിറക്കാൻ കേരള സർക്കാർ തീരുമാനിച്ചു. നിലവിൽ ഓരോ ആവശ്യങ്ങൾക്കും വെവ്വേറെ വാങ്ങേണ്ടി വരുന്ന നേറ്റിവിറ്റി സർട്ടിഫിക്കറ്റിന് പകരമായി, ഫോട്ടോ പതിപ്പിച്ച സ്ഥിരമായ സ്മാർട്ട് കാർഡാണ് സർക്കാർ വിഭാവനം ചെയ്യുന്നത്.
നിലവിലെ നേറ്റിവിറ്റി സർട്ടിഫിക്കറ്റിന് നിയമപരമായ പിൻബലമില്ലാത്തതിനാൽ അത് പലപ്പോഴും താൽക്കാലിക രേഖയായി മാത്രമേ പരിഗണിക്കപ്പെടുന്നുള്ളൂ. എന്നാൽ പുതിയ കാർഡിന് നിയമപ്രാബല്യം നൽകുന്നതിനായി സർക്കാർ പ്രത്യേക നിയമനിർമ്മാണം നടത്തും.
കാർഡ് ലഭിക്കുന്നതോടെ ഓരോ ആവശ്യങ്ങൾക്കും വില്ലേജ് ഓഫീസുകളിൽ കയറിയിറങ്ങുന്നത് ഒഴിവാക്കാം. ഇത് ഗുണഭോക്താക്കൾക്ക് ആജീവനാന്ത രേഖയായി ഉപയോഗിക്കാം.
ഫോട്ടോ പതിച്ച കാർഡ് ആയതിനാൽ സംസ്ഥാന സർക്കാരിന്റെ വിവിധ സേവനങ്ങൾക്കും ആനുകൂല്യങ്ങൾക്കും ഇത് ഔദ്യോഗിക തിരിച്ചറിയൽ രേഖയായി (Identity Proof) ഉപയോഗിക്കാം.തഹസിൽദാർമാർക്കായിരിക്കും കാർഡുകൾ വിതരണം ചെയ്യാനുള്ള അധികാരം.
"സ്വന്തം അസ്തിത്വം തെളിയിക്കാൻ ജനങ്ങൾ പ്രയാസമനുഭവിക്കുന്ന സാഹചര്യം ആശങ്കാജനകമാണ്. ഒരാളും സ്വന്തം നാട്ടിൽ നിന്ന് പുറന്തള്ളപ്പെടരുത്. താൻ ഈ നാട്ടുകാരനാണെന്ന് തെളിയിക്കാൻ ആധികാരികവും നിയമപിൻബലമുള്ളതുമായ ഒരു രേഖ ഓരോ വ്യക്തിയുടെയും കൈവശമുണ്ടാകണം. അതിനാണ് നേറ്റിവിറ്റി കാർഡ് ആവിഷ്കരിക്കുന്നത്," എന്ന് മുഖ്യമന്ത്രി പിണറായി വിജയൻ വാർത്താ സമ്മേളനത്തിൽ വ്യക്തമാക്കി.
കേന്ദ്രസർക്കാരിന്റെ പൗരത്വ നിയമങ്ങൾക്കെതിരെ ശക്തമായ നിലപാട് സ്വീകരിച്ച കേരളം, ജനങ്ങളുടെ അസ്തിത്വം ഉറപ്പാക്കാൻ സംസ്ഥാന തലത്തിൽ സ്വീകരിക്കുന്ന പ്രധാന നടപടിയാണിത്. റവന്യൂ വകുപ്പിനെയാണ് ഇതിനായുള്ള കരട് നിയമം തയ്യാറാക്കാൻ ചുമതലപ്പെടുത്തിയിരിക്കുന്നത്.