കോട്ടയം: ഉന്നത വിദ്യാഭ്യാസ മേഖലയുടെ വികസനത്തിനായി ഇന്ത്യയിൽ ഏറ്റവും കൂടുതൽ തുക ചിലവഴിക്കുന്ന സംസ്ഥാനം കേരളമാണെന്ന് മന്ത്രി വി.എൻ. വാസവൻ അവകാശപ്പെട്ടു. ഉന്നത വിദ്യാഭ്യാസത്തെ ആധുനിക തൊഴിൽ വിപണിയുമായി ബന്ധിപ്പിച്ച് വലിയ മാറ്റങ്ങൾ കൊണ്ടുവരാനാണ് സർക്കാർ ശ്രമിക്കുന്നതെന്നും അദ്ദേഹം കൂട്ടിച്ചേർത്തു.(Kerala government spends the most on higher education in India, says Minister VN Vasavan)
കേരളത്തിലെ ഉന്നത വിദ്യാഭ്യാസത്തെയും എം.ജി സർവകലാശാലയെയും ഭാവിയിലേക്ക് എങ്ങനെ രൂപപ്പെടുത്താം എന്നതായിരുന്നു 'എഡ്യു വിഷൻ 2035' എന്ന കോൺക്ലേവിന്റെ പ്രധാന ചർച്ചാവിഷയം. രണ്ട് ദിവസങ്ങളിലായി നടന്ന പരിപാടിയിൽ ശാസ്ത്രം, സാമൂഹ്യശാസ്ത്രം, അന്താരാഷ്ട്ര പഠനം, ഡിജിറ്റൽ വിദ്യാഭ്യാസം തുടങ്ങിയ മേഖലകളിൽ നാല് പ്രധാന പാനൽ ചർച്ചകൾ നടന്നു.
അമേരിക്ക, കാനഡ, യൂറോപ്പ്, ഓസ്ട്രേലിയ എന്നിവിടങ്ങളിൽ നിന്നുള്ള വിദഗ്ധർ പങ്കെടുത്ത രണ്ട് ഹൈബ്രിഡ് പാനൽ ചർച്ചകളും ഇതിന്റെ ഭാഗമായിരുന്നു. ലോകത്തിന്റെ വിവിധ ഭാഗങ്ങളിൽ പ്രശസ്തരായ എം.ജി സർവകലാശാലയിലെ മുൻകാല വിദ്യാർത്ഥികൾ നേരിട്ടും ഓൺലൈനായും ചർച്ചകളിൽ പങ്കെടുത്തു.