കൊച്ചി : ഒരു ലക്ഷമെന്ന ചരിത്ര റെക്കോർഡ് താണ്ടിയ സ്വർണ്ണവില ഇന്ന് വീണ്ടും കുതിപ്പ് തുടരുകയാണ്. പവന് 280 രൂപ കൂടി 1,01,880 രൂപ എന്ന നിലയിലും, ഗ്രാമിന് 35 രൂപ കൂടി 12,735 രൂപ എന്ന നിലയിലുമാണ് ഇന്ന് വിപണിയിൽ വ്യാപാരം പുരോഗമിക്കുന്നത്. (Kerala Gold price hike continues, know about today's price)
ആഗോള വിപണിയിലെ വില വർധനവിനൊപ്പം ഡോളറിനെതിരെയുള്ള രൂപയുടെ മൂല്യത്തകർച്ചയും ആഭ്യന്തര വിപണിയിൽ വില ഉയരാൻ കാരണമായി. ലോകത്തെ ഏറ്റവും വലിയ സ്വർണ ഉപഭോക്താക്കളായ ഇന്ത്യയിൽ, ഇറക്കുമതി ചെയ്യുന്ന സ്വർണത്തിന്റെ അളവ് വില നിർണ്ണയത്തിൽ പ്രധാന പങ്കുവഹിക്കുന്നു.
അന്താരാഷ്ട്ര വിപണിയിൽ സ്വർണത്തിന് വില കൂടുമ്പോൾ അത് നേരിട്ട് ഇന്ത്യയിലെ സ്വർണവിലയിലും പ്രതിഫലിക്കുന്നു. ആഗോള രാഷ്ട്രീയ സാഹചര്യങ്ങളും കേന്ദ്ര ബാങ്കുകളുടെ കരുതൽ ശേഖര നയങ്ങളും ഇതിനെ സ്വാധീനിക്കുന്നു. ഇന്ത്യ സ്വന്തമായി ഉൽപ്പാദിപ്പിക്കുന്ന സ്വർണം പരിമിതമായതിനാൽ ആവശ്യമായ സ്വർണം വിദേശത്തുനിന്നും ഇറക്കുമതി ചെയ്യുകയാണ് ചെയ്യുന്നത്. സർക്കാർ ഏർപ്പെടുത്തുന്ന ഇറക്കുമതി തീരുവയിലെ (Import Duty) മാറ്റങ്ങൾ വിപണിയിലെ വിലയെ സാരമായി ബാധിക്കുന്നു.
സ്വർണം ഇറക്കുമതി ചെയ്യുന്നത് ഡോളറിലാണ്. അതുകൊണ്ട് തന്നെ ഡോളറിനെതിരെ രൂപയുടെ മൂല്യം ഇടിയുന്നത് സ്വർണം വാങ്ങുന്നതിനുള്ള ചിലവ് വർദ്ധിപ്പിക്കുകയും ഇത് വിപണിയിൽ സ്വർണവില ഉയരുന്നതിന് കാരണമാവുകയും ചെയ്യുന്നു. വിവാഹ സീസണും ഉത്സവകാലങ്ങളും എത്തുന്നതോടെ സ്വർണത്തിന് ആവശ്യം വർദ്ധിക്കുന്നത് വരും ദിവസങ്ങളിലും വിലയിൽ ചാഞ്ചാട്ടമുണ്ടാക്കാൻ സാധ്യതയുണ്ടെന്നാണ് വിപണി വിദഗ്ധരുടെ വിലയിരുത്തൽ.