തിരുവനന്തപുരം: കേരളത്തോട് കേന്ദ്രസർക്കാർ മനഃപൂർവമായ സാമ്പത്തിക അവഗണന കാണിക്കുന്നുവെന്ന് മുഖ്യമന്ത്രി പിണറായി വിജയൻ ആരോപിച്ചു (Pinarayi Vijayan). സംസ്ഥാനം സ്വന്തം നിലയിൽ കൈവരിച്ച പുരോഗതിയെയും നേട്ടങ്ങളെയും പോലും അർഹമായ വിഹിതം നിഷേധിക്കാനുള്ള കാരണമായി കേന്ദ്രം മാറ്റുകയാണെന്ന് അദ്ദേഹം വാർത്താസമ്മേളനത്തിൽ പറഞ്ഞു. കിഫ്ബി (KIIFB) വായ്പകളെ സംസ്ഥാനത്തിന്റെ കടമെടുപ്പ് പരിധിയിൽ ഉൾപ്പെടുത്തി വായ്പാ വിഹിതം വെട്ടിക്കുറയ്ക്കുന്നത് 'സാമ്പത്തിക ഉപരോധം' ആണെന്നും അദ്ദേഹം വിശേഷിപ്പിച്ചു.
മൂലധന ചെലവിനായി കേരളം നടത്തുന്ന ഉദ്യമങ്ങളെ തുരങ്കം വയ്ക്കാനുള്ള തീവ്ര ശ്രമങ്ങളാണ് കഴിഞ്ഞ അഞ്ച് വർഷമായി കേന്ദ്രം നടത്തുന്നത്. ഗ്യാരന്റിയും വായ്പയും രണ്ടാണെന്ന് 1999-ൽ റിസർവ് ബാങ്ക് വ്യക്തമാക്കിയിട്ടുള്ളതാണ്. എന്നാൽ, ഇതിന് വിരുദ്ധമായി കിഫ്ബിക്ക് നൽകുന്ന ഗ്യാരന്റിയെ സംസ്ഥാനത്തിന്റെ വായ്പയായി ബോധപൂർവ്വം കണക്കാക്കി കമ്പോള വായ്പാ പരിധി വെട്ടിക്കുറച്ചു. 2025-26 വർഷത്തിൽ മാത്രം 14,358 കോടി രൂപയാണ് ഇത്തരത്തിൽ വെട്ടിക്കുറച്ചത്. നാഷണൽ ഹൈവേ അതോറിറ്റിയുടെ വൻതോതിലുള്ള കടം കേന്ദ്രത്തിന്റെ കടത്തിൽ ഉൾപ്പെടുത്താത്തവർ കേരളത്തെ മാത്രം ലക്ഷ്യം വയ്ക്കുന്നത് ഇരട്ടത്താപ്പാണെന്ന് മുഖ്യമന്ത്രി ചൂണ്ടിക്കാട്ടി.
ജിഎസ്ടി സമ്പ്രദായം വന്നതോടെ സംസ്ഥാനങ്ങളുടെ നികുതി അധികാരം പരിമിതപ്പെട്ടുവെങ്കിലും തനത് വരുമാനത്തിൽ വലിയ വർദ്ധനവുണ്ടാക്കാൻ എൽഡിഎഫ് സർക്കാരിന് സാധിച്ചു. 2021-ൽ 47,000 കോടി രൂപയായിരുന്ന നികുതി വരുമാനം ഇപ്പോൾ 80,000 കോടിയോളമായി ഉയർന്നു. എന്നാൽ, ജിഎസ്ടി നിരക്കുകളിൽ വരുത്തിയ മാറ്റം മൂലം വരാനിരിക്കുന്ന വർഷം കേരളത്തിന് 8,000 കോടി രൂപയുടെ വരുമാന നഷ്ടമുണ്ടാകും. ഇതിന് പുറമെ ഐജിഎസ്ടി (IGST) സെറ്റിൽമെന്റിന്റെ പേരിൽ 965.16 കോടി രൂപ കൂടി കേന്ദ്രം ഏകപക്ഷീയമായി വെട്ടിക്കുറച്ചതായും അദ്ദേഹം അറിയിച്ചു.
ദേശീയപാതാ വികസനത്തിനായി സ്ഥലമേറ്റെടുപ്പ് തുകയുടെ 25 ശതമാനം വഹിക്കാൻ തയ്യാറായ ഏക സംസ്ഥാനം കേരളമാണ്. ഇതിനായി നൽകിയ 5,580 കോടി രൂപയെയും വായ്പയായി കണ്ട് വായ്പാ പരിധിയിൽ ഉൾപ്പെടുത്തി ശിക്ഷിക്കുന്ന നടപടിയാണ് കേന്ദ്രം സ്വീകരിക്കുന്നത്. കൂടാതെ, പാവപ്പെട്ടവരുടെ ജീവനോപാധിയായ കേരള ലോട്ടറിക്ക് 40% നികുതി ചുമത്തിയത് കടുത്ത ജനദ്രോഹമാണ്. ഇത്തരത്തിൽ വിവിധ ഇനങ്ങളിലായി ആകെ 1,07,513 കോടി രൂപയുടെ വിഭവ നഷ്ടമാണ് സമീപകാലത്ത് കേരളത്തിന് ഉണ്ടായിരിക്കുന്നത്. ഈ അനീതിക്കെതിരെ യുഡിഎഫ് എംപിമാർ പാർലമെന്റിൽ ശബ്ദമുയർത്തുന്നില്ലെന്നും അദ്ദേഹം വിമർശിച്ചു.
Kerala CM Pinarayi Vijayan accused the Central Government of intentionally neglecting and economically strangulating the state by slashing its borrowing limits. He pointed out that despite submitting a detailed memorandum to Finance Minister Nirmala Sitharaman, the Centre continues to deduct loans taken by KIIFB from the state's credit ceiling. The CM highlighted a total resource loss of over ₹1 lakh crore due to various Central policies and vowed to continue the legal and democratic struggle for Kerala's constitutional rights.