തിരുവനന്തപുരം: വ്യവസായ മേഖലയിൽ സഹകരണവും പരസ്പര നിക്ഷേപവും വർദ്ധിപ്പിക്കാൻ കേരളവും തമിഴ്‌നാടും കൈകോർക്കുന്നു. കേരള വ്യവസായ മന്ത്രി പി. രാജീവ് ചെന്നൈയിൽ എത്തി തമിഴ്‌നാട് വ്യവസായ മന്ത്രി ടി.ആർ.ബി. രാജയുമായി നടത്തിയ ചർച്ചയിലാണ് ധാരണയായത്.(Kerala and Tamil Nadu to strengthen industrial cooperation, Ministers agree to cooperate in 5 areas)
ഇലക്ട്രോണിക്സ്, ധാതുസമ്പത്ത് തുടങ്ങിയ അഞ്ച് പ്രധാന മേഖലകളിൽ സഹകരണത്തിന് സാധ്യതയുണ്ടെന്ന് ഇരു മന്ത്രിമാരും വിലയിരുത്തി. വ്യവസായ നിക്ഷേപം ആകർഷിക്കുന്നതിനുള്ള തമിഴ്‌നാട് സർക്കാരിൻ്റെ പ്രത്യേക വിഭാഗമായ ഗൈഡൻസുമായി കേരളവും സഹകരിക്കും.
15 ദിവസത്തിനുള്ളിൽ ഇരു സംസ്ഥാനങ്ങളിലെയും സെക്രട്ടറിതലത്തിൽ ചർച്ചകൾ നടത്തി സഹകരണത്തിൻ്റെ വിശദാംശങ്ങൾ അന്തിമമാക്കാനും തീരുമാനമായിട്ടുണ്ട്. ഈ കൂടിക്കാഴ്ച കേന്ദ്രമന്ത്രി പീയൂഷ് ഗോയലിൻ്റെ നിർദ്ദേശപ്രകാരമായിരുന്നുവെന്ന് തമിഴ്‌നാട് വ്യവസായ മന്ത്രി ടി.ആർ.ബി. രാജ അറിയിച്ചു. ഇരു സംസ്ഥാനങ്ങൾ തമ്മിലുള്ള ഈ സഹകരണം ദക്ഷിണേന്ത്യൻ വ്യാവസായിക വളർച്ചയ്ക്ക് പുതിയ ദിശാബോധം നൽകുമെന്നാണ് പ്രതീക്ഷിക്കുന്നത്.