കണ്ണൂർ: സംസ്ഥാന സ്കൂൾ കലോത്സവത്തിൽ ജേതാക്കളായ കണ്ണൂർ ടീമിന് സ്വർണ്ണക്കപ്പുമായി ഇന്ന് ജില്ലയിൽ ഉജ്ജ്വല സ്വീകരണം നൽകും. കലോത്സവ വിജയത്തിന്റെ ആഹ്ലാദത്തിൽ ജില്ലയ്ക്ക് അവധി പ്രഖ്യാപിക്കുമെന്ന് പ്രതീക്ഷിച്ചിരുന്നെങ്കിലും ഇന്ന് പ്രവൃത്തിദിവസമായിരിക്കും. (Kannur will not have a holiday today even after winning the Kerala State School Kalolsavam golden cup)
അവധിയില്ലാത്തതിൽ സോഷ്യൽ മീഡിയയിൽ വിദ്യാർത്ഥികൾ തമാശ കലർന്ന പ്രതിഷേധം ഉയർത്തുന്നുണ്ടെങ്കിലും സ്വീകരണ പരിപാടികൾ വൻ ആഘോഷമാക്കാനാണ് സംഘാടകരുടെ തീരുമാനം. ഉച്ചയ്ക്ക് ജില്ലാ അതിർത്തിയായ മാഹിയിൽ വെച്ച് സ്വർണ്ണക്കപ്പിനെ ഔദ്യോഗികമായി സ്വീകരിക്കും.
ജില്ലയിലെ വിവിധ കേന്ദ്രങ്ങളിൽ സ്വീകരണം ഏറ്റുവാങ്ങി സ്വർണ്ണക്കപ്പുമായി വിജയികളുടെ യാത്ര മുന്നോട്ട് നീങ്ങും. വൈകുന്നേരം നാല് മണിക്ക് യാത്ര കണ്ണൂർ ടൗൺ സ്ക്വയറിൽ എത്തും. ടൗൺ സ്ക്വയറിൽ നടക്കുന്ന ചടങ്ങിൽ മന്ത്രി കടന്നപ്പള്ളി രാമചന്ദ്രന്റെ നേതൃത്വത്തിൽ ജില്ലയുടെ അഭിമാനമായ പ്രതിഭകളെ ആദരിക്കും.
കലോത്സവ വിജയത്തിന് പിന്നാലെ അവധി പ്രഖ്യാപിക്കുമോ എന്നറിയാൻ കണ്ണൂർ ജില്ലാ കലക്ടറുടെ ഫെയ്സ്ബുക്ക് പേജിൽ നിരവധി വിദ്യാർത്ഥികളാണ് തിരച്ചിൽ നടത്തിയത്. കലക്ടർ വിജയികൾക്ക് അഭിനന്ദനം അറിയിച്ച് പോസ്റ്റ് ഇട്ടതിന് പിന്നാലെ, "അഭിനന്ദനം മാത്രമേ ഉള്ളൂ? അവധി ഇല്ലല്ലേ" എന്ന തരത്തിലുള്ള കമന്റുകളുമായി നിരാശരായ വിദ്യാർത്ഥികൾ രംഗത്തെത്തി. അവധി പ്രഖ്യാപിക്കാത്തതിനെക്കുറിച്ചുള്ള രസകരമായ ട്രോളുകളും ഗ്രൂപ്പുകളിൽ സജീവമാണ്.