കോഴിക്കോട്: അർബുദബാധയെ തുടർന്ന് അന്തരിച്ച കൊയിലാണ്ടി എം.എൽ.എ.യും സി.പി.എം. നേതാവുമായ കാനത്തിൽ ജമീലയുടെ സംസ്കാരം മറ്റന്നാൾ (ചൊവ്വാഴ്ച) ഔദ്യോഗിക ബഹുമതികളോടെ നടക്കും. അത്തോളി കുനിയിൽക്കടവ് ജുമമസ്ജിദിലാണ് ഖബറടക്കം. ഇന്നലെ രാത്രി കോഴിക്കോട്ടെ സ്വകാര്യ ആശുപത്രിയിൽ വെച്ചാണ് കാനത്തിൽ ജമീല (63) അന്തരിച്ചത്.(Kanathil Jameela's funeral the day after tomorrow with official honors)
ഭൗതിക ശരീരം സി.പി.എം. കോഴിക്കോട് ജില്ലാ കമ്മിറ്റി ഓഫീസിൽ പൊതുദർശനത്തിന് വെക്കും. കൊയിലാണ്ടി ടൗൺഹാളിൽ പൊതുദർശനമുണ്ടാകും. സി.പി.എം. സംസ്ഥാന സെക്രട്ടറി എം.വി. ഗോവിന്ദൻ, മന്ത്രി പി.എ. മുഹമ്മദ് റിയാസ്, എം.കെ. രാഘവൻ എം.പി., കെ.കെ. രമ എം.എൽ.എ. ഉൾപ്പെടെയുള്ള നേതാക്കൾ ആശുപത്രിയിലെത്തി അന്തിമോപചാരം അർപ്പിച്ചു.
ഗ്രാമപഞ്ചായത്തംഗമായി രാഷ്ട്രീയ പ്രവർത്തനം തുടങ്ങിയ കാനത്തിൽ ജമീല, 2021-ലെ നിയമസഭാ തിരഞ്ഞെടുപ്പിൽ കൊയിലാണ്ടിയിൽ നിന്നാണ് നിയമസഭയിലേക്ക് എത്തിയത്. മലബാറിൽ നിന്നുള്ള ആദ്യത്തെ മുസ്ലിം വനിത എം.എൽ.എ. എന്ന പ്രത്യേകതയും അവർക്കുണ്ട്. സി.പി.എം. കോഴിക്കോട് ജില്ലാ കമ്മറ്റിയംഗമായിരുന്നു. നേതാവിന്റെ വിയോഗത്തിൽ മുഖ്യമന്ത്രി ഉൾപ്പെടെയുള്ളവർ അനുശോചനം രേഖപ്പെടുത്തി.
"കൊയിലാണ്ടി എം.എൽ.എ.യുടെ നിര്യാണം അത്യന്തം ദുഃഖകരമാണ്. ജനകീയ പ്രശ്നങ്ങളിൽ സജീവമായി ഇടപെട്ടിരുന്ന നേതാവായിരുന്നു. ചെറുപ്രായത്തിൽ തന്നെ കമ്യൂണിസ്റ്റ് പാരമ്പര്യത്തിലേക്ക് വന്ന ജമീല തദ്ദേശ സ്ഥാപനങ്ങളിൽ പ്രവർത്തിച്ച് ഭരണമികവ് തെളിയിച്ച് പടിപടിയായി ഉയർന്നു വന്ന നേതാവാണ്," മുഖ്യമന്ത്രി പറഞ്ഞു.
എം.വി. ഗോവിന്ദൻ പറഞ്ഞത് "സി.പി.എമ്മിന് മികച്ച നേതാവിനെയാണ് നഷ്ടമായത്. രോഗത്തോട് പോരാടി ജീവിതത്തിലേക്ക് മടങ്ങി വരുമ്പോഴാണ് ഈ മരണം. നല്ല പെരുമാറ്റത്തിലൂടെ ജനഹൃദയങ്ങളിൽ സ്ഥാനം നേടിയ വ്യക്തിയാണ്. പഞ്ചായത്ത് മെമ്പറായി തുടങ്ങി എം.എൽ.എ. വരെ ആയി മികച്ച പ്രവർത്തനം കാഴ്ചവെച്ചു. നിയമസഭയിലും മികവാർന്ന പ്രകടനം നടത്തി," എന്നാണ്.
വിടവാങ്ങിയ കൊയിലാണ്ടി എം.എൽ.എ. കാനത്തിൽ ജമീല കേരളത്തിലെ പൊതുരംഗത്തിന് ജനകീയസൂത്രണ പ്രസ്ഥാനം സംഭാവന ചെയ്ത കരുത്തുറ്റ വനിതാ നേതാക്കളിൽ ഒരാളായിരുന്നു. ഒരു സാധാരണ വീട്ടമ്മയിൽ നിന്ന് ത്രിതല പഞ്ചായത്തുകളുടെ അധ്യക്ഷ സ്ഥാനങ്ങളിലേക്കും, തുടർന്ന് നിയമസഭയിലേക്കുമുള്ള അവരുടെ വളർച്ച, വികേന്ദ്രീകൃത ജനാധിപത്യം കേരളത്തിലെ സ്ത്രീജീവിതങ്ങളിൽ വരുത്തിയ പരിവർത്തനത്തിന്റെ അടയാളമാണ്.
വീട്ടകങ്ങളിൽ ഒതുങ്ങിപ്പോയ സ്ത്രീ ജീവിതങ്ങളെ സമൂഹത്തിന്റെ മുഖ്യധാരയിലേക്ക് കൊണ്ടുവരാൻ ജനകീയ ആസൂത്രണ പ്രസ്ഥാനം നിർണായക പങ്ക് വഹിച്ചു. 1996-ൽ കേരളത്തിൽ വികേന്ദ്രീകൃത ജനാധിപത്യത്തിലൂന്നി ഗ്രാമസഭകൾ ചേർന്ന് പദ്ധതികൾ ആസൂത്രണം ചെയ്യാൻ തുടങ്ങിയതോടെ, പദ്ധതി രൂപീകരണത്തിലും നിർവഹണത്തിലും സ്ത്രീകൾക്ക് കാര്യമായ പങ്കാളിത്തം ലഭിച്ചു. താഴെത്തട്ടിലുള്ള ഈ പ്രവർത്തനമാണ് ജമീലയെപ്പോലെ ഒരുപറ്റം കരുത്തുറ്റ വനിതാ നേതാക്കളെ കേരളത്തിന് നൽകിയത്.
തലക്കുളത്തൂർ പഞ്ചായത്തിലെ ഇടത്തരം മുസ്ലിം കുടുംബത്തിലെ വീട്ടമ്മയായിരുന്ന കാനത്തിൽ ജമീലയുടെ പൊതുരംഗത്തേക്കുള്ള പ്രവേശനവും ഈ ജനകീയസൂത്രണ കാലത്തായിരുന്നു.