തിരുവനന്തപുരം: കമലേശ്വരത്ത് അമ്മയെയും മകളെയും വിഷം കഴിച്ച് മരിച്ച നിലയിൽ കണ്ടെത്തിയ സംഭവത്തിൽ മകളുടെ ഭർത്താവ് ഉണ്ണികൃഷ്ണനെതിരെ ഗുരുതര ആരോപണങ്ങളുമായി ആത്മഹത്യാക്കുറിപ്പ്. "എന്റെ മകളെ 25 ദിവസം ഉപയോഗിച്ച ഉടുപ്പ് പോലെയാണ് അവൻ എറിയുന്നത്" എന്ന് മാതാവ് സജിത കുറിച്ച വാക്കുകൾ ദാമ്പത്യ പീഡനത്തിന്റെ ആഴം വെളിപ്പെടുത്തുന്നതാണ്.
വിവാഹം കഴിഞ്ഞ് കേവലം 25 ദിവസം മാത്രമാണ് ഇവർ ഒരുമിച്ച് താമസിച്ചത്. പിരിയാൻ തക്ക കാരണങ്ങൾ ഒന്നുമില്ലാതിരുന്നിട്ടും ഉണ്ണികൃഷ്ണൻ ഗ്രീമയെ ഉപേക്ഷിച്ചു. തിരികെ വിളിക്കാൻ മകൾ കെഞ്ചിക്കരഞ്ഞിട്ടും അയാൾ തയ്യാറായില്ല. 200 പവൻ സ്വർണ്ണവും വീടും സ്ഥലവും സ്ത്രീധനമായി നൽകിയിട്ടും അത് പോരെന്ന് പറഞ്ഞ് മകളെ മാനസികമായി പീഡിപ്പിച്ചിരുന്നു.
കഴിഞ്ഞ ദിവസം ഉണ്ണികൃഷ്ണന്റെ ബന്ധുവിന്റെ മരണവീട്ടിൽ വെച്ച് നടന്ന തർക്കമാണ് ആത്മഹത്യയിലേക്ക് നയിച്ചത്. അവിടെ വെച്ച് ഉണ്ണികൃഷ്ണൻ മോശമായി സംസാരിച്ചതിനെ തുടർന്ന് സജിത ബോധരഹിതയായി വീണിരുന്നു. ഈ അപമാനഭാരം സഹിക്കാൻ വയ്യാതെയാണ് ജീവിതം അവസാനിപ്പിക്കുന്നത് എന്ന് കുറിപ്പിൽ പറയുന്നു.
ഇരുവരും സയനൈഡ് കഴിച്ചാണ് മരിച്ചതെന്ന് പോലീസ് പ്രാഥമികമായി സ്ഥിരീകരിച്ചു. മൃതദേഹത്തിന് സമീപത്ത് നിന്ന് രണ്ട് ഗ്ലാസുകൾ കണ്ടെത്തിയിട്ടുണ്ട്. അതീവ സുരക്ഷയോടെ മാത്രം കൈകാര്യം ചെയ്യേണ്ട സയനൈഡ് ഇവർക്ക് എവിടെ നിന്ന് ലഭിച്ചു എന്നതിനെക്കുറിച്ച് പൂന്തുറ പോലീസ് വിശദമായ അന്വേഷണം ആരംഭിച്ചു. മൂന്ന് മാസം മുൻപ് സജിതയുടെ ഭർത്താവ് രാജീവ് മരിച്ചതിനെ തുടർന്ന് ഇവർ കടുത്ത മാനസിക വിഷമത്തിലായിരുന്നുവെന്നും പോലീസ് സൂചിപ്പിക്കുന്നു.
നിലവിൽ ഉണ്ണികൃഷ്ണനെതിരെ ആത്മഹത്യാ പ്രേരണാ കുറ്റം ചുമത്തി പോലീസ് ലുക്കൗട്ട് നോട്ടീസ് പുറപ്പെടുവിച്ചിട്ടുണ്ട് (ഇതിനിടെ ഇയാൾ മുംബൈയിൽ വെച്ച് പിടിയിലായതായും റിപ്പോർട്ടുകളുണ്ട്).