കൊച്ചി: നവീകരണ ജോലികൾ പൂർത്തിയാക്കാതെ കലൂർ ജവഹർലാൽ നെഹ്‌റു സ്റ്റേഡിയം സ്പോൺസർ ജിസിഡിഎയ്ക്ക് കൈമാറി. നവംബർ 30-നകം സ്റ്റേഡിയം നവീകരിച്ച് കൈമാറുമെന്നായിരുന്നു സ്പോൺസറുടെ വാഗ്ദാനം. ജിസിഡിഎ ചെയർമാന്റെ വിശദീകരണം അനുസരിച്ച്, സ്റ്റേഡിയത്തിനകത്തെ പ്രധാന ജോലികൾ പൂർത്തിയായിട്ടുണ്ട്. ബാക്കിയുള്ള ജോലികൾ ജിസിഡിഎയും സ്പോൺസറും സംയുക്തമായി പൂർത്തിയാക്കാനാണ് നിലവിലെ തീരുമാനം.(Kaloor Stadium renovation half way through, Sponsor hands over stadium to GCDA )
അർജന്റീന ടീമിന്റെ സൗഹൃദ മത്സരത്തിനായി സെപ്റ്റംബർ 26-നാണ് സ്റ്റേഡിയം സ്പോൺസർ ഏറ്റെടുത്തത്. 70 കോടി രൂപ ചെലവിൽ പുതിയ കവാടം, ചുറ്റുമതിൽ, വി.വി.ഐ.പി. സിറ്റിങ് ഏരിയ, സീറ്റിങ് അറേഞ്ച്മെന്റ്, ടർഫ് നവീകരണം തുടങ്ങിയവയായിരുന്നു വാഗ്ദാനം ചെയ്തിരുന്നത്. സ്റ്റേഡിയത്തിന്റെ പ്രവേശന കവാടം ഉൾപ്പെടെയുള്ള പ്രധാന നിർമ്മാണ പ്രവർത്തനങ്ങൾ പൂർത്തിയായിട്ടില്ല.
നവംബർ 30 വരെയായിരുന്നു സ്പോൺസറും സ്പോർട്‌സ് കൗൺസിൽ ഓഫ് കേരളയും ജിസിഡിഎയും തമ്മിലുള്ള ത്രികക്ഷി കരാർ നിലവിലുണ്ടായിരുന്നത്. നിലവിലെ നിർമ്മാണ പ്രവർത്തനങ്ങൾക്ക് സ്പോൺസർക്ക് സമയം അനുവദിക്കുന്നതിനൊപ്പം ജിസിഡിഎയും നവീകരണ പ്രവർത്തനങ്ങൾ ഏറ്റെടുക്കും. ഇതിനായി സ്റ്റേഡിയത്തിന്റെ നിലവിലെ സാഹചര്യം ജിസിഡിഎ എൻജിനീയറിങ് വിഭാഗം പരിശോധിക്കും.
അർജന്റീന ടീമിന്റെ കേരള സന്ദർശനവുമായി ബന്ധപ്പെട്ട സ്റ്റേഡിയം കൈമാറ്റം വിവാദമായപ്പോൾ, നിയമക്കുരുക്ക് ഒഴിവാക്കാനായി കായിക വകുപ്പും ജിസിഡിഎയും സ്പോൺസറുമായി പുതിയ ത്രികക്ഷി കരാർ ഉണ്ടാക്കുകയായിരുന്നു. നവീകരണ പ്രവർത്തനങ്ങൾ നടക്കുന്നതിനിടെ ഈ മാസം ആദ്യം കലൂർ സ്റ്റേഡിയത്തിലെ സ്പോൺസറായ ആർ.ബി.സി.യുടെ സൈറ്റ് ഓഫീസിൽ മോഷണം നടന്നതായി കാണിച്ച് ജിസിഡിഎ പോലീസിൽ പരാതി നൽകിയിരുന്നു. ഓഫീസ് കുത്തിത്തുറന്ന് രേഖകൾ പരിശോധിച്ചുവെന്നും ചില രേഖകളും മൊബൈൽ ചാർജറും നഷ്ടപ്പെട്ടുവെന്നും പരാതിയിലുണ്ട്. പിടിച്ചുനിൽക്കാൻ മറ്റ് വഴികളില്ലാതായതോടെ സ്റ്റേഡിയം നവീകരണത്തിന് കരാറില്ലെന്ന് നേരത്തെ കായിക മന്ത്രി സമ്മതിച്ചിരുന്നു.